Улатăр хулинчи 2-мĕш спорт шкулĕнче Раççей Геройне Александр Старчкова асăнса виççĕмĕш хут республика шайĕнчи волейбол турнирĕ иртнĕ. Çакăн пек ăмăртусем йĕркелени — ентешсен паттăрлăхне сума суни кăна мар, çамрăксене патриотла воспитани парас, массăллă спорта аталантарас ĕçе пысăк тÿпе хывни те.
Турнира Атăлçи тăрăхĕнчи виçĕ регионтан — Чăваш Енрен, Мордва республикинчен тата Чулхула облаçĕнчен 16 команда хутшăннă.
«Аль» спорт шкулĕнчи Владимир Захаров тренер-преподавателĕн воспитанникĕсем иккĕмĕш вырăн çĕнсе илни чăннипех те пысăк çитĕнÿ!
«Командăна, тренера тата ашшĕ-амăшне чаплă çĕнтерÿпе чун-чĕререн саламлатăп. Умра çĕнĕрен çĕнĕ спорт ÿсĕмĕ, вĕренÿре çитĕнÿсем кĕтчĕр. Спорт вăл — сывлăхпа вăй-хал никĕсĕ!» — тенĕ округ пуçлăхĕ Олег Ломоносов Телеграм-каналĕнче.
