1935 ÇУЛТА ФЕВРАЛĔН 17-МĔШĔНЧЕ ТУХМА ПУÇЛАНĂ (Газета издается с 17 февраля 1935 года)
Суббота, 5 Апрель 2025 г.
14 февраля 2025 г. 11:42

Александр Миронов ячĕпе турнир

Нарăс уйăхĕн 6-мĕшĕнче Ямпулатра çуралса ÿснĕ Александр Станиславович Миронов Чечен Республикинчи хирĕçтăрура паттăррăн çапăçса пуçне хунăранпа 30 çул çитрĕ. 1995 çулта Тушкил шкулĕнчи историпе краеведени музейĕнче ентеше халалланă асăну кĕтесĕ йĕркеленĕ. Унта Саша Мироновăн шкул дневникĕ, çар командованийĕ парнеленĕ сехет, Паттăрлăх орденĕ, хăй усă курнă ытти япаласем упранаççĕ. 2022 çулта ăна асăнса хăй вĕреннĕ класра Герой парттине вырнаçтарнă.

1998 çултанпа вара çуралнă кунĕнче çуллен Тушкилти вăтам шкулта Ямпулат каччине асăнса уçă волейбол турнирĕ иртет. Кăçал кунта Тăвай, Вăрмар муниципалитет округĕсенчен, Çĕнĕ Шупашкар хулинчен шкул ачисен чи вăйлă волейбол командисем пуçтарăнчĕç. Ăмăрту умĕнхи асăну линейкинче шкул ертÿçин çумĕ Анастасия Кузьмина, муниципаллă округ администрацийĕнче çамрăксемпе ĕçлекен тĕп специалист Наталья Колоколова, Тушкил территори уйрăмĕн ертÿçи Александр Трофимов сăмах каларĕç. Çавăн пекех тĕлпулăва шкулта пĕрле вĕреннĕ ачасем килнĕ. Юстицин аслă советникĕ, шкулта чухне Сашăпа пĕрле волейболла вылянă Сергей Александров юлташĕн çирĕп характерĕ, уçă кăмăлĕ, шанчăклăхĕ çинчен аса илчĕ, ăмăртăва хутшăнакансене çĕнтерÿ патне пĕтĕм вăя, пĕлĕве парса ăнтăлма сунчĕ.

Уçă турнира вуникĕ команда хутшăнчĕ. Яшсем хушшинче мала тухассишĕн Тушкилти, Элпуçĕнчи, Тăвайри П.Х.Бухтулов ячĕллĕ, Тăрмăшри, Вăрмарти Г.Е.Егоров ячĕллĕ вăтам шкулсен тата Çĕнĕ Шупашкарти 2-мĕш номерлĕ спорт шкулĕн командисем тупăшрĕç. Çичĕ сехете яхăн пынă хĕрÿ кĕрешÿре Çĕнĕ Шупашкарсен команди турнир çĕнтерÿçи пулса тăчĕ. Тушкил шкулĕн команди иккĕмĕш вырăн йышăнчĕ, виççĕмĕшне Вăрмарти вăтам шкул çĕнсе илчĕ.

Хĕрсем хушшинче те кĕрешÿ çав тери çивĕч пулчĕ. Шкул спортзалĕнче тĕрлĕ командăсемшĕн «çунакансен» сасси мĕн ăмăртусем пĕтичченех пĕрре те шăпланмарĕ. Кунта та ултă команда турнир парнисемшĕн кĕрешрĕ. Вĕсен хушшинче Тушкилти, Тăрмăшри, Элпуçĕнчи, Тăвайри П.Х.Бухтулов ячĕллĕ, Вăрмар округĕнчи В.Д.Николаев ячĕллĕ Мăнçырмари тата çав округри Г.Е.Егоров ячĕллĕ Вăрмарти вăтам шкулсен командисем. Пĕрремĕш вырăна хĕрсем хушшинче Вăрмарти вăтам шкул çĕнсе илчĕ, иккĕмĕшпе виççĕмĕш вырăнсенче — Тăвайри тата Мăнçырмари вăтам шкулсен командисем. Тушкил шкулĕнчи хĕрсен команди тăваттăмĕш вырăн йышăнчĕ. Ăмăртăва йĕркелекенсем мала тухнисене дипломсем, медальсем парса хавхаланарчĕç, çĕнтерÿçĕсене тельняшкăсем парнелерĕç, вăййа хутшăннă спортсменсене вара пурне те пылак çимĕçсемпе сăйларĕç.

Чи пултаруллă спортсменсене те палăртрĕç, уйрăм парнесемпе чысларĕç, вĕсен шутĕнче — Камилла Шусева (Тушкил), Виктория Михайлова тата Диана Васильева (Мăнçырма), Мария Дмитриева (Тăвай шкулĕ).

Шкул ачисен хушшинчи асăну турнирĕ Тушкил шкулĕн чи ырă йăлисенчен пĕри пулса тăчĕ. Вăл çамрăк ăрăва спортпа туслă пулма кăна мар, туслăха çирĕплетме, паттăр ентешсене сума сума, вĕсен ячĕсене ĕмĕр асра тытма вĕрентет. Шкул администрацийĕ, унăн ертÿçи Е.С.Емельянова çакăн пек ырă йăласене упрас тесе нумай тăрăшаççĕ. Халĕ те турнира çÿллĕ шайра ирттерсе ярас тесе чылай ĕç туса ирттерчĕç. Çавăн пекех ăмăртусен тĕп судйи В.С.Захаров тренер-преподователь, шкулта физкультура урокĕсене ертсе пыракан Н.Ф.Давыдов вĕрентекен, ялта пурăнакан активлă çамрăксем кашни çулах турнир шайне çÿлерех çĕклесе пыраççĕ. Малашне те иртнине асра тытса, паянхи куна çутăрах та ырăрах туса, малашлăха шанса пурăнасчĕ.

 

Валерий ПЕТРОВ,

шкулти историпе

краеведени музейĕн ертÿçи

Поделиться:
Распечатать