Тăвай хутлăхĕнче тухса тăракан пичет изданийĕ — «Ял ĕçченĕ» хаçат çак кунсенче сумлă датăна палăртать. 90 çул ĕнтĕ вăл пирĕн тăрăхри çынсен пурнăçне, ĕç-хĕлне çутатса тăрать, тăван кĕтесе малалла аталантарма хавхалантарать.
Çак йĕркесен авторĕн те массăллă информацин районти хатĕрĕнче вăй хума тÿр килчĕ иртнĕ ĕмĕрĕн сакăрвуннăмĕш çулĕсенче. Культура институтне пĕтерсе Тăвайри библиотекăра ĕçлекенскере, корреспондент-радиоорганизатор пулма шанчĕç. Хамшăн çĕнĕлĕх пулса тăракан ĕçе 1982 çулхи нарăс уйăхĕн-че кÿлĕнтĕм. Малтанлăха çăмăлах марччĕ, паллах, радио передачисем валли материалсем хатĕрлеме, эфира тухма... Çав вăхăтра тĕп редакторта тăрăшнă Г.В.Соловьев, хаçатра ĕçлекен пысăк опытлă журналистсем И.И.Соловьев, И.И.Гладков, А.Р.Романов, В.И.Илларионов, И.Г.Григорьев, çамрăк специалистсем Раиса Кайсарова (Шумова), Альбина Тимофеева (Никитина) пулăшнипе, хам тăрăшнипе те пулĕ, кĕçех çĕнĕ специальноçа алла илсе пытăм.
Район пурнăçне тĕрлĕ енлĕн çутатса пама тăрăшнă радио кăларăмĕсенче. Передачăсене линипе техника цехĕнчи студирен эрнере виçĕ хутчен тÿрремĕнех ирттернĕ. Çураки, ĕççи вăхăтĕнче вара кашни кунах эфира тухма тивнĕ. Пресс-центр пĕлтернине, хуçалăхсенче тыр-пул пухса кĕртесси мĕнле пынине, ĕç паттăрĕсен ячĕсене çийĕнчех халăх патне çитермелле пулнă. Хаçат та хĕрÿ ĕççинче куллен тухса тăратчĕ. Микрофон умне тĕрлĕ сферăри специалистсене чĕннĕ. Çавăн пекех, вăл е ку уявпа çыхăнтарса, студиренех шкул ачисемпе литмонтажсем йĕркеленĕ.
Радио передачисем йĕркеленисĕр пуçне, хаçат валли те статьясем сахал мар çырнă. Унсăр пуçне, редакцин ытти сотрудникĕсем пекех, хаçат номерĕсене типографире кăларнă çĕрте дежурнăй пулма тивнĕ. Линотиписткăсем, верстальщицăсем, печатниксем кăткăс ĕçсене тăрăшса пурнăçлатчĕç. Чылай ĕçе алă вĕççĕн тăватчĕç. Малтан хаçата хамăр типографирех, каярах Канаш типографийĕнче пичетленĕ. Цифра технологийĕ нумай çăмăллатрĕ ĕçе.
Редакцире пĕр хушă ответлă секретарь должноçĕнче те ĕçлеме тÿр килчĕ. 1988 çулхи пуш уйăхĕнче вара, урăх ĕçе куçарнă май, хаçатăн туслă коллективĕнчен уйрăлма тиврĕ. Каярахпа радио ĕçне район администрацийĕн тытăмне куçарчĕç. Пĕтĕмпе 15 çул хатĕрлесе ертсе пытăм радио передачисене. 2002 çултанпа — Раççей журналисчĕ-сен Союзĕн членĕ эпĕ. Редакци коллективĕ- пе халĕ те тачă çыхăну тытатăп. АПК ветеранĕсен Союзĕн пайташĕ пулнă май, вырăнти уйрăм ĕçне çутатса пыма тăрăшатăп.
Сумлă юбилейĕпе саламласа, хаçат редакцийĕн пултаруллă коллективне çĕнĕ çитĕнÿсем тума сунатăп.
Людмила ПАВЛОВА
