Йăнтăрчă ял территорийĕн- чи ялсенчи пухусене муниципалитет округĕн пуçлăхĕ Олег Ломоносов, администраци пайĕсен пуçлăхĕсем, тĕрлĕ ĕç тытăмĕн представителĕсем хутшăннă, отчетлă тапхăрти ĕçсем çинчен чарăнса тăнă, граждансен ыйтăвĕсем çине хуравланă.
Территори уйрăмĕн начальникĕ Александр Карсаков ялсенче 2024 çул валли йышăннă проектсене пурне те ĕçе кĕртнине палăртнă. Тенеяльне илес пулсан, автобус остановки патне çити 100 метр тăршшĕ çутă çитернĕ, çăва патне каймалли 270 метр çула вак чул сарса хытарнă. Масар çинче вилнисемпе сывпуллашмалли ятарлă вырăн тунă. Антонина Егорова урамĕнчи 380 м çула вак чул сарса çĕнетнĕ.
Çак ялти пуçарулăх бюджечĕн проекчĕсене паллă ентеш, «Акконд» акционерлă общество ертÿçи Валерий Иванов пулăшнипе ĕçе кĕртнĕ. Çакăншăн ентеше чун-чĕререн тав тăваççĕ кунта пурăнакансем. Кăçал Тенеяльсем купель тума, çăлпа яла пырса кĕнĕ çĕрти пĕвене тасатма тĕллев лартнă. пуçарусене ырласа, Валерий Николаевич хальхинче те ял халăхĕ-пе пĕрле пуласса шантарнă.
Йăнтăрчăра кăçал ятарлă çар операцине хутшăнакансен ячĕпе хывнă йывăçсен аллейи йĕри-тавра карта тытса çавăрмалла. Астăвăм ĕçне Салминсен çемйи хăйсен чи çывăх çынни Александр Силантиевич СВОра çар тивĕçне пурнăçласа паттăррăн вилнĕ хыççăн пуçарнă.
Пĕлтĕр Улянкăра халăха шывпа тивĕçтермелли тытăма тĕпрен çĕнетнĕ. Демографи лару-тăрăвĕ кунта округри ытти ялсенчен лайăхрах, пĕчĕк ялта иртнĕ çул 4 ача çуралнă.
Кăçал пуçару бюджечĕ-пе Улянкăра Володя Семенов, Йăнтăрчăра К.Маркс, Лесная, Разин урамĕсенчи çулсене юсамалла, автобус остановки тумалла.
Алевтина УСЬКИНА,
территори уйрăмĕн тĕп специалисчĕ
