Тăвай районне йĕркеленĕренпе 90 çул çитет. Паллах, кашни çыншăн пĕлтерĕшлĕ пулăм. Суту-илÿ-ре 40 çула яхăн тăрăшнăран, мана Енĕш Нăрваш ялĕнчи çак тытăмра камсем ĕçлени кăсăклантарчĕ
1930 çулсен вĕçнелле ялти икĕ лавкка та йывăçран пулнă. Григорий Лукин хăйĕн ывăлĕпе Николайпа ĕçленĕ. Каярахпа Гордей Ефимов, Иван Исаев суту-илÿре тăрăшнă. 1960 çулсенче юнашар магазин туса лартсан йывăççинче хуçалăх таварĕ-сем сутма пуçланă. Лидия Моисеева мăшăрĕпе лавккана пăсичченех ĕçленĕ. Малти кас лавккинче Галина Лубашкина, Нина Филиппова мăшăрĕпе сутуçăра тăрăшнă.
Кайри кас лавкки Ленин урамĕн вĕçĕнче вырнаçнă, йывăç çуртран пулнă. Тĕрлĕ çулсенче суту-илÿре Феодосия Михайлова, Алевтина Трофимова, Александра Меркурьева, Нина Зайцева, Иван Ефимов, Виктор Николаев, Тамара Антонова, Вера Ленькова, Людмила Васильева (Коннова) тата ыттисем ĕçленине те лайăх астăваççĕ ял çыннисем.
Пурнăç улшăннăçемĕн лавккасене те çĕнетсе пынă. Кирпĕчрен тунă хыççăн Нина Данилова, Юлия Егорова, Антонина Матвеева ĕçленĕ тивĕçтерÿ сферинче. Сутуçăн тавар туянаканпа пĕр чĕлхе тупма пĕлмелле. Унăн лавккана килес килсех тăтăр, таварне туянма та, чуна уçса калаçма та. Халĕ потребобщество магазинĕсем урлă «Ял ĕçченĕ» хаçата альтернативлă майпа йÿнĕрех çырăнса илме те пулать. Коллективра вара пĕр-пĕрне шанса, ĕçе пĕлсе те пурнăç ыйтнă пек йĕркелесе пырсан кăна ÿсĕм пулать. Зоя Алешкина, Галина Трофимова, Светлана Иванова манăн ĕçтешсем пулса, чылай хушă суту-илÿре тăрăшнă.
Паян ялти потребобщество магазинĕнче Людмила Васильевапа Любовь Спиридонова халăх ыйтăвне туллин тивĕçтереççĕ. Лавккара хăтлă, таварсенчен ытларахăшĕ вырăнта туса кăларнисем. Çынсене мĕн кирлине вăхăтра кÿрсе парса тăраççĕ. Кирлĕ тавара киле пырса парассине йĕркелесе янă. Пит тухса çÿреймен сусăрсемшĕн те, ытти çынсемшĕн те меллĕ пулăшу ку.
Район юбилейĕ унăн аталанăвĕшĕн тăрăшнă тата халĕ вăй хуракансен уявĕ. «Тăвайри кооператив» потребобществăн маттур çыннисем те округ пуянлăхĕ пулса тăраççĕ, унăн малашлăхĕшĕн вăй-халне шеллемеççĕ.
Надежда ЧЕРНОВА,
ял старости
