Шурă питлĕ хаçата
Пĕр уçайса вуласчĕ.
Хамăн чунăм савнипе
Ударница пуласчĕ.
(Хĕрсен юрринчен)
Сарлака Эль шывĕ лăпкăн хумханать. 3—4 çул ĕлĕкрех çав Эль хĕрринче ватăлса кайнă йăмрасем саркалана-саркалана ларатчĕç. Халĕ çав «ватă сухалсен» вырăнне çĕнĕ йăмрасем яштакаланса, лапсăркка калпак тăхăнса ларчĕç.
Эпир виççĕн Эл хĕрринче вăлтапа пулă тытса ларатпăр. Ман çумра — Якур. Якур çумĕнче Шакров Яков ларать. Хамăр калама çук шăппăн ларатпăр. Хытă калаçсан — пулли лекмест-çке-ха. Эпĕ Шупашкарта чухнех хам шăллăм Лукка çырăвĕ тăрăх, пирĕн районта хаçат тухма пуçламалла тенине илтнĕччĕ.
Акă паян пулă тытса ларнă вăхăтра хайхи хаçат çинчен калаçу пуçартăмăр.
— Пермек, эсĕ районти хаçата курнă-и? — тет ман çумăмра ларакан Шакров.
— Çук,— тетĕп.
— Ман пата ĕнер 1-мĕш номерĕ килчĕ.
Вăлтасене шыв хĕррине хăварсах анкарти хыçĕпе Шакров патне хаçат курма чупрăмăр. Акă пирĕн умра пĕчĕк форматлă хаçат. Эпĕ калама çук хĕпĕртерĕм. Хаçата хам кĕсьене чикрĕм. Каçпа ялти хресченсен пухăвĕ пуçтарăннă. Манăн çĕнĕ хаçатпа ялти ватăсене питĕ паллаштарас килчĕ. Çав шутпа пуху пуçтарăнакан хурал пÿрт- не хаçата чиксе тухса утрăм. Çитрĕм. Пуху пуçланман-ха. Эпĕ хам тавра çынсене пухса хаçат вуласа парас шутпа:
—Тинĕс пичче, сана хаçат вуласа парам-и? — терĕм хайхи пĕр шур сухаллă старике.
Ман патăма пĕр самантрах 10—12 çын пуçтарăнчĕ. Эпĕ вулатăп. Акă, пирĕн ялтан икĕ çухрăмра кăна ларакан çăлпуçсем çинчен вулатăп.
— Ку хаçат Шупашкартан килнĕ-и? — теççĕ мана.
— Канашран килнĕ. Ку ĕнтĕ пирĕн районта тухать,— ăнлантаратăп эп хамăр ялсене.
— Ытла та пĕчĕккĕ-çке хаçат. Кунта нимĕн чухлĕ те çырмалăх çук,— тет кукăр чăпăклă чĕлĕм хыпнă Сикут Якăпĕ.
... Чăнах та вăл вăхăтра хаçат пĕчĕккĕ-ччĕ. Вулакансен массине хăй çумне питех те туртатчĕ. Пĕчĕкскерне часах вуласа тухаттăмăр та.
— Ах, пĕтрĕ-çке, ма тата çук кунта,— теттĕмĕр.
Унтанпа акă пилĕк çул. Паян хаçатăн формачĕ пысăккă. Чĕлхе тĕлĕшĕнчен те пахалансах пырать. Хаçат экземплярĕ, хаçата çыракан ялкорсен йышĕ куллен кунах ÿсет. Пилĕк çул кĕрешÿре пулнă тăван хаçата хĕрÿллĕ салам.
