Пĕр тилĕшĕн — пин тенкĕ

Тăвай тăрăхĕ вăрмансемпе пуян. Юлашки çулсенче халăх йышĕ пĕчĕкленнĕрен те, вăрмана çӳреме пăрахнăран та çутçанталăк вăй илсех пырать. Çавăнпа та вăрман чĕрчунĕсем пирĕн тăрăхри ялсене тăтăшах кĕрсе çӳреççĕ. Вăл шутра тилĕсем те.Çак чĕрчун хитре, ытлашши хăратмасть пулин те, этемшĕн те, килти выльăхшăн та питĕ хăрушă пулма пултарать. Тилĕсем урмăш чирне сарма пулăшакан тĕп тискер кайăк шутланаççĕ. Ку амак вируслă, ăна хальлĕхе сиплеме пĕлмеççĕ-ха. Çынсем те, выльăх-чĕрлĕх те ан аптăратăр тесен тилĕсен йышне картра тытса тăрас пулать.
Тăвай тăрăхĕн кăçалхи бюджетĕнче тилĕсен йышне чакармашкăн хушма укçа пăхса хунă. Ăна сунарçăсене парĕç. Пĕр тытнă тилĕ пуçне пин тенкĕ тӳлеççĕ. Укçи-тенкине илес тесен сунарçăн тискер кайăка Чăваш Енри патшалăх ветеринари службин «Чĕрчунсен чирĕсемпе кĕрешекен Тăвай район станцине» илсе килсе парас пулать.
Тилĕсене тытнăшăн вара округ администрацийĕн ял хуçалăхĕпе экологи пайĕ укçи-тенкине тӳлĕ. Çыхăнмалли телефон номерĕ: 8-835-48-2-15-90