Аслă çĕнтерÿ пулнăранпа 80 çул çитнине халалланă «Раççей йĕлтĕр йĕрĕ» чупу Тăвай тăрăхĕнчи 1500 ытла çынна «Аль» спорт шкулĕн территорине пухрĕ иртнĕ шăматкун. Çулленхи хĕллехи спорт тапхăрне савăнăçлă лару-тăрура уçса, Тăвай муниципалитет округĕн пуçлăхĕ Олег Ломоносов кăçалхи мероприятие районăн 90 çулхи юбилейне халалланине те пĕлтерчĕ. Ăмăрту участникĕ- сене саламланă май, йĕлтĕрпе ярăнни массăллă спорта аталантарма, халăх сывлăхне çирĕплетме пысăк пĕлтерĕшлĕ пулнине палăртрĕ.
Чăваш Республикинчи Патшалăх ветеринари службин руководителĕ Александр Шакин, Чăваш Республикин Патшалăх Канашĕн депутачĕ Леонид Пронин ăмăртăва çÿл- лĕ шайра йĕркеленине курса вĕсем те, участниксене ăнăçлă старт пачĕç, ăнăçу сунчĕç.
Йĕлтĕр трасси çине садик ачинчен пуçласа аслă ÿсĕмри таранах тăнă. 14 ушкăн категорийĕнче палăртрĕç çĕнтерÿçĕсене.
VIP-чупура Э.Буинцевпа («Аль» СШ) Р.Якуркинана (Тĕмер) çитекен пулмарĕ.
Ача сачĕсене çÿрекенсенчен А.Галяутдинова, М.Муханов тата Е.Павлова малти вырăнсене тухрĕç.
Тĕрлĕ ÿсĕмри шкул ачисенчен Д.Буржов, Ю.Максимова (Тăвай шкулĕ), В.Максимов, Е.Ефремова, А.Нилов, В.Гурьева, Г.Никифоров (Элпуç), Е.Петрова, Н.Петров, П.Васильев, М.Федорова (Тăрмăш шкулĕ) çĕнтерчĕç.
Ялсен территори уйрăмĕсемпе организацисенчи йĕлтĕрçĕсенчен О.Никифорова, А.Никифорова (Элпуç), Е.Ушмарин, Е.Михайлова, Н.Георгиев, Н.Максимова, З.Матросова (Тăрмăш), Э.Буинцев («Аль» СШ), В.Кириллов (Канаш) малтан çитрĕç финиша.
70 çулхи тата аслăраххисем хушшинче Н.Иванов (Улянкă), В.Афанасьевпа (Тăрмăш) М.Ефимова (Элпуç) пĕрремĕш, Мучар ялĕнчи В.Лаврова иккĕмĕш вырăнсене пайларĕç.
Кашнинех çĕкленÿллĕ кăмăл парнелерĕ спорт уявĕ. Вĕри чейпе, тутлă кукăльсемпе сăйланма май пулчĕ. Мала тухнисене медальсемпе, грамотăсемпе, асăнмалăх парнесемпе чысларĕç.
Йĕлтĕр çине тăнă асанне-кукамайсем, пирĕн кĕмĕл волонтерсем мăнукĕ-сене хавхалантарма тухнă. Кулленех куратăн вĕсене спорт комплексĕн территорийĕнче. «Спорт — пурнăç йĕрки» федераци проекчĕпе килĕшÿллĕн сывлăха çирĕплетме тĕрлĕ майсем туса панă хастар ÿсĕмрисем валли округра.
Раиса ШУМОВА
