Пуçару бюджечĕн мелĕпе
Чăваш Енре пуçаруллă бюджет мелĕпе пур-нăçлама 2025 çул валли конкурспа 1555 проекта суйласа илнĕ. Вĕсене ĕçе кĕртме 3,3 млрд тенкĕ хывма палăртнă. Иртнĕ 5 çулта вара республикăра граждансен пуçарăвĕсем çинче никĕсленнĕ 5218 проекта пурнăçлама 5,8 млрд тенкĕ хывнă.
Тăвай округĕнче иртнĕ çул 115 пуçару проекчĕ пурнăçа кĕнĕ, пĕтĕмпе 103 миллион тенкĕлĕх ĕç тунă. Кăçал пирĕн округра 89 проект пурнăçа кĕртме палăртнă
Çĕрулми куравĕ
Регионсен пĕрлехи «Çĕрулми—2025» куравĕ пуш уйăхĕн 5-6-мĕшĕсенче Шупашкарти МТВ-Центрта уçăлать. Ку вăл шучĕпе 17-мĕш курав, ял хуçалăх министрĕ Сергей Артамонов пĕлтернĕ тăрăх, унта çĕршывăн 15 регионăн представителĕсем килессе çирĕплетнĕ. Вăрлăхлăх тата çимелли çĕрулми, ÿс- ен тăрана хÿтелемелли хатĕрсем, техника, оборудовани курма, туянма, блюдăсен дегустацийĕ те пулĕ.
Çын тата закон
Республикăра пĕлтĕр преступленисен шучĕ 5 процент чакнă. Право органĕн представителĕ-сем преступлени тунă 4,7 пин çынна тупса палăртнă, вĕсенчен 282-шĕ — унчен тунисем.
Наркотиксен саккунсăр çаврăнăшĕпе çыхăннă 965 тĕслĕхе уçса панă. Уголовлă майпа 318 çынна явап тыттарнă, саккунсăр çаврăнăшран 500 кг ытла наркотик туртса илнĕ. Республикăри çулсем çинче 812 авари (2023 çулта—882) пулнă, вĕсенче 106 çын (2023 çулта—124 çын) вилнĕ, 1023 çын суранланнă
Республика кунĕ
Республика Пуçлăхĕ Олег Николаев Патшалăх Канашне янă Çырăвĕнче Республика кунне уявламашкăн уйăракан гранта 10 млн тенкĕрен 20 млн тенке çитернине каланă. Иртнĕ çул уяв Тăвай округĕнче çÿллĕ шайра иртнĕ. Уйăрнă грант Тăвай округĕн общество инфраструктурине аталантарма кайнă.
Агроклассене —çĕнĕ оборудовани
Ку ĕç «АПКри кадрсем» федераци проекчĕ пулăшнипе пурнăçланать. Кăçал 7 агрокласа хальхи йышши оборудованипе тивĕçтерме палăртнă. Малтанхи 2 çулта аграри предприятийĕсем пулăшнипе 130 агролаборатори уçнă, «Профессионалитет» проектпа Çĕрпÿри аграри техникумне çĕнетме 100 млн тенкĕ уйăрнă. Агроклассене 5-шер миллион тенкĕ уйăраççĕ.
Тăвай округĕнче Тушкил шкулĕнчи агрокласра малтанхи çулсенче çĕр ĕçлесе хатĕрлемелли ял хуçалăх техникине вĕреннĕ пулнă. Кăçал та Чăваш аграри университечĕпе килĕшÿ тунă, унти преподавательсем агроклассниксемпе уйăхра икĕ хутчен дистанци мелĕпе занятисем ирттереççĕ, пĕлтерчĕ шкул директорĕ Е.Емельянова.
