Кашни коллектив çитĕнĕвĕ, кунти ĕçченĕсен палăрăмлă кăтартăвĕсем кун-çул историне çырăнса юлнă, малашне те юлĕç.
Акă иртнĕ çул «Чăваш Ен Хĕрарăмсен пĕрлĕхĕ» общество организацийĕн пуçарăвĕпе ăнăçлă ĕçлекен ялти хĕрарăмсен реестрне йĕркеленĕ. «Хĕрарăм — ял управçи!» проектри республикăри экономика аталанăвне пысăк тÿпе хывакан 100 хĕрарăмран виççĕшĕ — Тăвай муниципалитет округĕнчен: Т.Н.Юркина предприниматель, «Кубнинская» сыр цехĕн ертÿçи; Т.В.Обаськина, «Янтиковский хлеб» ООО директорĕ; Н.Р.Федорова — Тушкилти Илларионов хуçалăхĕнчи сĕт туса илессипе ĕçлекен ХФХ пуçлăхĕ. Паян вĕсенчен пĕрин çинчен пулĕ сăмахăм.
Тăвай районне йĕркеленĕренпе 90 çул çитни шăпах Татьяна Обаськинан 55 çулхи юбилейĕпе пĕр килет. Çулталăк итогĕсене пĕтĕмлетсе, малашлăхри тĕллевсене палăртмалли вăхăт та.
— Пирĕн лавккасенче хамăр туса кăларакан çăкăр-булка, кондитер изделийĕсен ассортименчĕ пысăк. Халăх ыйтнине шута илсе йĕркелетпĕр производствăна,— пуçларĕ калаçăва Татьяна Витальевна. — Иртнĕ çул коллектив 266 тонна ытла продукци туса кăларнă. Çав шутран 226 тоннине çăкăр-булка, ыттисене кондитер изделийĕсем йышăнаççĕ. Çапла 29 миллион та 800 пин тенкĕлĕх паха продукци кăларнă. Хатĕр çимĕç округри ялсенчи лавккасене, харпăр хăй тытакан, Вăрмарпа Канаш, Красноармейски округĕсенчи суту-илÿ сечĕ- сене ăсанать. Çавăн пекех Тăвай тăрăхĕнчи вĕрентÿ-пе шкулчченхи учрежденисенчи ачасене паха апатпа тивĕçтерме предприяти хăйĕн тÿпине хывать.
«Тăвай çăкăрĕ» предприяти округра ăнăçлă ĕçлекенсен йышĕнчине пĕлтерсе, Т.В.Обаськина ертÿçĕ çĕнетÿ тапхăрне те палăртмасăр иртмерĕ. Халиччен чустана алăпа çăрса, грамшарăн виçсе пайланă пулсан, халĕ чуста çăракан агрегат, пайлакан автомат ĕçе нумай çăмăллатать. 2024 çулта ĕçлев условийĕсене лайăхлатса, 1 млн ытла тенкĕлĕх юсав ĕçĕсем ирттернĕ. Çутăпа шыв ăшăтакан оборудование «сенкер çулăм» çине куçарни нумай укçа-тенке перекетлеме май панă. Техника паркне пуянлатса, çăкăр турттаракан машина туянма май килнĕ. Модернизаци туса ирттернипе продукци туса кăларнин кăтартăвĕ те ÿс-нĕ. Пĕтĕмĕшле илсен, 100 яхăн ассортиментпа тухать хатĕр продукци Тăвайри çăкăр заводĕн- чен. Хальтерехри çĕнĕ продуктсенчен, «Карельский», пăрирен пĕçернĕ çăкăр, сырпа кукуруза хутăшĕнчен янтăланă пашалу илĕртет тавар туянакансене. Вĕсене тинтерех кăларнă сентресем çине. Тавара чĕркесси таранах çĕнетсе улăштарнине асăрханах ĕнтĕ лавккасене кĕрекенсем.
«Вĕри çăкăр» проекта ĕçе кĕртесси те хавхалантарать цех ĕçченĕсене. Сăмах майăн, предприятире 27 çын вăй хурать. Маларах Тăвайри магазинсене кăна тивĕçтернĕ пулсан вĕри çăкăрпа, халĕ Тушкил, Сăхăтпуç, Улянкă, Йăнтăрчă, Тăрмăш, Енĕш Нăрваш, Вăрманхĕрри, Кивĕ тата Çĕнĕ Пуянкасси халăхĕ те вĕри çăкăр туянма кăнтăрла иртсен ял лавккине васкать.
Татьяна Обаськина — депутатсен округ Пухăвĕн депутачĕ, «Тăвайри кооперативри» профсоюз комитечĕн председателĕ. Общество ĕçĕн хастарĕ ял ачисен картиш футболне аталантарма пысăк тÿпе хывать. Вунă çул та пулĕ СХТ территорийĕн-чи ятарлă лапамра ача-пăчапа çамрăксен командисем çуллахи каникулта турнир йĕркелессине йăлана кĕртнĕ. Ашшĕ-амăшне те явăçтараççĕ спорт юхăмне. Унсăр пуçне предприяти ертÿçи хăй те ăста спортсмен-шашист. Тăвайсен чысне регионта та ăнăçлă хÿтĕлет.
Ашшĕпе амăшĕ, Виталий Васильевичпа Римма Кузьминична, Вăтаялĕнчи хуçалăхра тăрăшнăскерсем, ачисене те çăкăр хакне пĕлсе ÿс- тернĕ, ĕçченлĕхе, тÿрĕ чунлă пулма вĕрентнĕ. Çемье хаклăхĕсене упрасси вĕсенчен куçнă та хĕрĕн кил-йышне. Мăшăрĕпе Вениамин Николаевичпа икĕ ывăл çитĕнтернĕ.
Татьяна Витальевна хастарлăхĕ иксĕлми тейĕн. Ир-ирех ĕç вырăнĕнче вăл. Сахал-им ертÿçĕн татса памалли ыйтусем. 36 çулхи ĕç стажĕнчен 20 çул хуçалăх тилхепине çирĕппĕн тытса пырать. Чун ыйтнипе суйланă ĕçе нихăçан та улăштарма шутламан.
«Çăкăртан асли çук»,— теççĕ. Тăвайсем пĕçерекенни вара тутлă тенине илтме пулать хулара пурăнакан ентешсенчен. Çапла пултăрччĕ!
Раиса ШУМОВА
