Çĕршыв тăрăх куçса çÿрекен «Çĕнтерÿ пуйăсĕ» музей выставка пĕлтĕр те Тăвай шкулĕнче вĕренекенсенче тарăн йĕр хăварнăччĕ. Кăçал вара шкулти волонтерсем Шупашкара çула тухнă, поезд çине вырнаçтарнă интерактивлă куравпа паллашса хăрушă вăрçă çулĕсене куç умне кăларнă.
Экспозицисене тематикăна кура 10 вакуна вырнаçтарнă, Тăван çĕршывăн Аслă вăрçин тапхăрĕсене кăтартса панă.
1941 çулхи çĕртме уйăхĕн 22-мĕшĕ хыççăнхи вăрçă пуçламăшĕ, халăх тăшмана хирĕç кĕрешĕве çĕкленнĕ. Тыл ĕçченĕсем «Пĕтĕмпех çĕнтерÿ валли!» чĕнÿпе фронта мĕн кирлипе тивĕçтереççĕ. Вăрçă вăхăтĕнче пирĕн республикăна 28 завод куçарнă. Чăваш енре 15 эвакогоспиталь ĕçленĕ. 70 пин ытла çын пурăнма килнĕ, Тăвай тăрăхĕнче те тăванĕсем пекех йышăннă эвакуаципе килнисене.
Куравра сăнланнă ним айăпсăр çынсене асаплантарса вĕлернĕ тĕслĕх-сем чуна ыраттараççĕ. Кунтах медицина ĕçченĕсен паттăрлăхĕ те. Акă, Çĕнтерÿ саманчĕ...
Хальхи технологисемпе, çутă тата сасă элеменчĕсемпе усă курни историлле событисене куракан патне яр-уççăн çитерет. Геройсен скульптурисем те пуянлатаççĕ. Çапла, кашни вакун çав кунсен чăнлăхне çĕнĕрен чĕртсе яракан тĕнче тейĕн. Ачасемшĕн çак çулçÿрев иртнĕ кунсене асра тытмалли пĕлтерĕшлĕ урок пулса тăчĕ.
Çак проекта йĕркелекенсене историе сĕртĕнме май туса панăшăн тав тăватпăр. Çамрăк ăрăвăн патриотизмне вăйлатса, асаттесен паттăрлăхне хисеплесе вăрçă хăрушлăхне нихăçан та ан манччăр тесе тăрăшнă вĕсем.
Ольга ЕРШОВА,
вожатăй, П.Х.Бухтулов ячĕллĕ
Тăвайри вăтам шкул
