Чутей шкулĕнче совет çарĕсене Афганистанран илсе тухнăранпа 36 çул çитнине паллă туса иртнĕ тĕлпулу «Россия - моя страна» юрăпа уçăлчĕ. Салтаксен паттăрлăхне мухтаса, вĕсен ячĕсемпе яланах мăнаçланмаллине палăртса ура çине тăрса Гимн юрларĕç.
Тăвай Енри пограничниксен пĕрлĕхĕн ертÿçи Геннадий Андреевич Николаев, Владимир Ильич Степанов пограничник-ветеран, çавăн пекех Чутейри Г.И.Шамбулин воин-афганецпа педагогика ĕçĕн ветеранĕ В.В.Шамбулин шкул хăнисем пулчĕç, паттăрлăх урокĕсем ирттерчĕç.
Вăрçăран таврăнайман салтаксене асăнса шăплăх минучĕ иртрĕ. Г.А.Николаев хăйĕн сăмахĕн-че çакăн пек мероприятие Тăвайри таврапĕлÿ музейĕнче анлăн йĕркеленине, Николай Афанасьев ячĕллĕ Тĕмерти вăтам шкулта Николай Жилкин, Василий Козлов, Григорий Гаврилов афганецсем тата чикĕ хуралĕн ветеранĕ Вадим Кайсаров хутшăннине асăнчĕ. Вăл Тăвай тăрăхĕнчи салтаксен паттăрлăхĕ, чуна ыраттаракан СВОри çухатусем çинче те чарăнса тăчĕ. Общество членĕсем йывăрлăхра яланах пулăшма хатĕррине палăртрĕ.
Ачасене Геннадий Андреевич хăй Китай чиккинче погранслужбăра тăни интереслентерчĕ. Тĕрлĕ ыйтусем парса кăсăкланчĕç вĕсем. Г.Николаев çитĕнекен ăрăва патриотла воспитани пама хастар хутшăннăшăн обществăлла наградăпа - «Пограничное братство» медальпе А.В.Гуринана, Л.И.Титована, И.М.Васильева, В.В.Шамбулина чысларĕ. Г.И.Шамбулина тата В.И.Степанова «Защитнику границ Отечества» медальпе хавхалантарчĕ.
Кашни хăна ачасен умĕнче калаçни вырăнлă та усăллă пулчĕ. Çакă вĕсен чĕринче пĕрлĕхпе паттăрлăх туйăмне вăратать, Тăван çĕршыва кирек хăш вăхăтра та хÿтĕлеме хатĕр пулмаллине вĕрентет.
Людмила МИХАЙЛОВА, Чутей шкулĕ
