Кăçалхи оборонăпа массăллă тата спорт уйăхлăхне Чăваш Енре Çĕнтерÿпе патриотизм çулталăкне, Тăван çĕршывăн Аслă вăрçинче çĕнтерÿ тунăранпа 80 çул çитнине халалланă. Уйăхлăх Енĕш Нăрваш шкулĕнче мероприятисенчен пуян: волейбол турнирĕ йĕркеленĕ, ачасем хăйсем ăсталанă самолетсене вĕçтернĕ, 5-9 классенче ОФП хатĕрленĕвне кăтартнă. Нарăсăн 13-мĕшĕнчи ĕç-хĕле совет салтакĕсене Афганистанран илсе тухнăранпа 36 çул çитнине халалларĕç. Пуçламăш классенчи çамрăк армеецсем стройпа салтаксем пек мăнаçлăн утрĕç, пулас хÿтĕлевçĕсен пултарулăхне кăтартрĕç.
Савăнăçлă саманта шкул директорĕ Раиса Илларионова уçса, тĕлпулăва килнĕ хăнапа паллаштарчĕ. Олег Григорьев - ялти воин-интернационалистсенчен пĕри, вăл нарăсăн 15-мĕшĕ Тăван çĕршыв тулашĕнче служба тивĕçĕсене пурнăçланă салтаксене асăнмалли кун пулнине пĕлтерчĕ. Ачасене мирлĕ пурнăç, çутă малашлăх сунчĕ. Парад хыççăн 5-8 класс ачисемпе тĕлпулу ирттерчĕ. Олег Валерианович шкулта аван вĕреннĕ, спорт ăмăртăвĕсене хутшăннă. Канашри ДОСААФ шкулĕнче водитель правине илнĕ хыççăн хĕсмете кайнă.
Çак професси ăна çарта питех те кирлĕ пулнă. Афган çĕрĕ çинче службăра тăнă вăхăтра çунтармалли-сĕрмелли материалсем турттарнă. Транспорт колонни пĕрре кăна мар вут-çулăм айне пулнă, тытăçуран ăнăçлă тухнă. «Машина рульне тытса пынă вăхăтра та автомат яланах çумра пулнă»,- терĕ вăл ачасемпе калаçнă май. Пĕр-пĕр- не пулăшасси, юлташлăх туйăмĕ кирек ăçта та чи кирлине палăртнă салтак-ветеран. «Халĕ вара вăрçă хирĕнчисемпе ял çыннисен пĕрлĕхĕ нацистсене çĕнтерме май паратех»,- вĕçленĕ калаçăвне воин-интернационалист.
Çамрăк ăрăва патриотла воспитани пама хастар хутшăннăшăн О.В.Григорьева шкул дирекцийĕ Хисеп грамотипе чысланă, «Тăван Енĕш Нăрваш» ятлă кĕнеке парнеленĕ.
Олег ЯРМУЛИН,
Енĕш Нăрваш шкулĕ
