Тăвай районне йĕркеленĕренпе 90 çул çитнине уявласа Тăрмăшри вăтам шкулта тĕрлĕ мероприятисем пулаççĕ.
«Тăрмăш шкулĕ: ĕнер тата паян» музей урокĕ 3 тата 5 классенче иртрĕ.
Унта педагогика ĕçĕн ветеранне В.Г.Сидорова чĕнтĕмĕр. Вăл шкулта 32 çул ачасене тарăн пĕлÿ панă. Унсăр пуçне Вячеслав Гаврилович шкулти историпе таврапĕлÿ музейне йĕркеленĕ. Вăл, сăн ÿкерчĕк-семпе усă курса, ачасене шкул уçнăранпа паянхи кунчченех епле улшăнни çинчен каласа пачĕ.
1884 çулхи кăрлач уйăхĕн 16-мĕшĕнчен пуçласа Михаил Семенов пĕрремĕш учитель ĕçлеме пуçланă шкулта. Павел Сидоров хресченĕн уйрăм çуртĕнче вырнаçнă шкул. Тăван çĕршывăн Аслă вăрçи вăхăтĕнче нумай учитель вăрçа тухса кайни пирки пĕлтерчĕ. Вячеслав Гаврилович шкулта тĕрлĕ вăхăтра ĕçленĕ ертÿçĕсемпе паллаштарчĕ. Çак çулсенче пирĕн шкултан вĕренсе тухнă çамрăксем пирки каласа кăтартрĕ. Вĕсем хушшинче паллă çĕр ĕçченĕсем, артистсемпе музыкантсем, ăсчахсем, пысăк çитĕ- нÿллĕ спортсменсем пур. Тĕлпулура тăван шкул çинчен интереслĕ çĕнĕ хыпарсем нумай пĕлчĕç, тавракурăмне аталантарчĕç ачасем.
