1935 ÇУЛТА ФЕВРАЛĔН 17-МĔШĔНЧЕ ТУХМА ПУÇЛАНĂ (Газета издается с 17 февраля 1935 года)
Пятница, 4 Апрель 2025 г.
21 февраля 2025 г. 8:48

Унăн ăш пиллĕхĕ пурин валли те çитнĕ

Любовь Семеновна Васильева - Кармал ялĕнчи чи аслă çынсенчен пĕри. Çак кунсенче 92 çул тултарчĕ. Улянкă ялĕнче 1933 çулхи нарăс уйăхĕн 10-мĕшĕнче çут тĕнчене килнĕ. Ашшĕ Семен çамрăк чух патша çа- рĕнчен шурă лашапа киле таврăнни çинчен ачисене юптарса панине тăтăшах аса илнĕ хĕрача.

Çемьере пилĕк хĕр çитĕннĕ. Улатăрти медицина училищине вĕренсе пĕтернĕ хыççăн Любăна Кармалти фельдшерпа акушер пунктне ĕçлеме янă. Çав вăхăтсенче ялта çын нумай пурăннă, çемьесем йышлă пулнă. Кашни килтех - 5-7 ача. Ялти фельдшерăн пепкесене çут тĕнчене килме ытларах чух хăйĕнех пулăшма тивнĕ.

Çапла çул хыççăн çул иртнĕ. Л.С.Васильева ФАП заведующийĕ пулса 42 çул хушши Кармал халăхне сипленĕ. Çанталăка пăхмасăр, канмалли куна шута илмесĕр, килти ĕçе пăрахса чирлисене пулăшма васканă ялти тухтăр. Сиплев çуртĕнче санитаркăра пĕрле тăрăшнă Мария Яковлевна Максимова аса илнĕ тăрăх, фельдшерицăн алли çăмăл пулнă, вăл çĕлесе янă суран таврашĕ хăвăрт тÿр-леннĕ, шыçман. Хăйĕн ĕçне юратса, пĕлсе тунă ачаллах шурă халатлă ĕçчен пулма ĕмĕтленнĕ хĕр.

Шутласа пăхсан, ялта пурăнакан кашни çыннах тенĕ пекех çут тĕнчене килме е сипленме пулăшнă Любовь Семеновна. Çынсемпе лăпкăн та ăшшăн калаçакан шурă халатлă медицина ĕçченне пурте хисепленине, юратнине, итленине ачаранах курса тĕлĕннĕ эпĕ. Хăйне май темле вăй тапса тăнă ĕнтĕ унра. Унăн ăш пиллĕхĕ пурин валли те çитнĕ. Мăшăрĕпе В.В.Васильевпа 5 ача çуратса ÿстернĕ, пурнăç çулĕ çине тăратнă. Василий Васильевич шкулта вырăс чĕлхипе литературине вĕрентетчĕ, шкул директорĕнче те тăрăшрĕ. Аслă Аттелĕх вăрçин участникĕ Балтика тинĕсĕнче шыв айĕнчи карап çинче службăра пулнă, шел, паянхи кун вăл пирĕн хушăра çук ĕнтĕ. Сăмах май каласан, Саша ывăлĕ те, Сергей мăнукĕ те шыв айĕнче ишекен карап çинче салтак тивĕçне пурнăçланă. Любовь Семеновнапа Василий Васильевичăн ачисем пурте аслă пĕлÿллĕ, çĕршывăн тĕрлĕ кĕтесĕн-че тăрăшнă, халĕ вĕсем те тивĕçлĕ канура ĕнтĕ.

Владислав Васильевича пурте пĕлетпĕр ĕнтĕ, район депутачĕ пулса ырă ĕç нумай турĕ, «Дорстрой» пĕрлешĕвне ертсе пычĕ. Халĕ ывăлĕсем ашшĕ ĕçне малалла тăсаççĕ. Саша - строитель, халĕ тивĕçлĕ канура, хурт-хăмăр ĕрчетет. Таня хĕрĕ Набережные Челны хулинче КамАЗсем тăвакан заводра тĕп бухгалтерăн çумĕ пулнă. Люся та çав хуларах тĕпленнĕ, больницăра терапевт пулса тăрăшать. Ира коопераци институтне пĕтернĕ, юридици пĕлĕвĕ илнĕ. Шупашкарта ревизорта ĕçленĕ.

Халĕ, чире пула вы- рăнпа выртма пуç-ланăранпа, Ира хĕрĕпе Саша ывăлĕ амăшне пăхаççĕ. Паянхи кун 6 мăнук, 14 кĕçĕн мăнук Любовь Семеновнан.

Çирĕп сывлăх, çĕк- ленÿллĕ кăмăл сунатпăр сывлăх сыхлавĕн ĕç ветеранне.

Поделиться:
Распечатать