Чи малтанах «Ял ĕçченĕ» хаçатра ĕçлекенсене, ветерансене, вулакансене тăван пичет кăларăмĕ 90 çул тултарнă ятпа чун-чĕререн саламлатăп. Тенеяльпе кун-çулăма çыхăнтарнăранпа çырăнса илетĕп ăна. Тăвай ен сăн-сăпачĕ илемленсе, пуянланса пынине палăртма питех те кăмăллă. Хаçатçăсем те хăйсен тивĕçне чун-чĕререн пурнăçланине курса тăратпăр эпир, ялти вулакансем. Цифра технологийĕпе усă курма пуçланăранпа сăн-сăпачĕпе палăрмаллах илемленчĕ.
Часах Тăвай районне йĕркеленĕренпе 90 çул çитнине уявлатпăр. Тенеяльне илсен, ял хăтлăланни, çулсем çĕнелни савăнтарать. 1980 çулсенче яла çити çуран утаттăмăр. Халĕ асфальт çул, автобус пирĕнни пек пĕчĕк яла куллен 4 рейс тăвать. Кил-çурта «сенкер çулăм» ăшăтать, кранран юхакан шыв хула хăтлăхне аса илтерет. Пуçаруллă бюджет программи ял инфратытăмне çĕнетме, тавралăха хăтлăлатма пулăшакан мелсенчен пĕри пулса тăчĕ. Ăна ял халăхĕ пĕр шухăшлă пулса хутшăнать. Иртнĕ çул 4 проект ĕçе кĕнĕ Тенеялĕнче, кăçалхи тĕллевсем те пысăк.
Тенеяльсем ĕçре те, ытти ĕç-хĕлте те маттур. Хамăрăн пĕчĕк çĕршыва хисеплесе, унăн пуласлăхĕшĕн тăрăшса, акă, Владимир Иванович Сергеев таврапĕлÿçĕ «Живой родник» ?«Чĕрĕ çăлкуç»% кĕнеке кăларчĕ. Икĕ томран тăраканскер энциклопеди евĕрлех. Тăвай ят-сумне çĕкленĕ паллă çынсене халалланă ăна, кунтах тăван тавралăх илемĕ сăнланнă. Шкул ачисемпе студентсемшĕн те паха материал, вĕсемпе вĕренÿре усă курнишĕн савăнатăп. Автор унпа кăмăл тăвакансене тивĕçтерме пултарать. Çавăн пек хамăр тăрăх пуянлăхне сăнлакан кĕнекесем ытти ялсенче те тухчăр.
Надежда АНИСИМОВА, Тенеялĕ
