1935 ÇУЛТА ФЕВРАЛĔН 17-МĔШĔНЧЕ ТУХМА ПУÇЛАНĂ (Газета издается с 17 февраля 1935 года)
Пятница, 4 Апрель 2025 г.
28 февраля 2025 г. 9:15

Экспорт калăпăшĕ ÿссе пырать

Чăваш Енре 2020-2024 çулсенче экспорт калăпăшĕ 37 процент ÿснĕ.

Хальхи вăхăтра Кăркăсстан, Казахстан, Беларуç, Инди, Китай, Узбекистан, Азербайджан, Молдова, Пĕрлештернĕ Араб Эмирачĕсем, Турци Чăваш Республикин пысăк суту-илÿ партнерĕсем шутланаççĕ. Пĕтĕмпе республика экспорт тата импорт енĕпе 51 çĕршывпа çыхăну тытать.

Чикĕ леш енче ытларах пирĕн машинăсене, транспорт хатĕрĕсене, апат-çимĕç таварĕсемпе чĕр тавара, хими промышленноçĕн продукцине ыйтаççĕ. 2024 çулта пĕчĕк тата вăтам бизнес субъекчĕсен экспорт калăпăшĕ икĕ хут ÿснĕ. Регионăн экспорт майĕсене пысăклатма, çĕршывсем хушшинчи çыхăнăва йĕркелеме Чăваш Республикин Министрсен Кабинечĕ пулăшнипе 46 куравпа ярмăркка тата конкурс мероприятийĕсем ирттернĕ.

Республика Пуçлăхĕн Олег Николаевăн хушăвĕ-пе Чăваш Енре экспорт ĕçне аталантарассипе тĕллевлĕн ĕçлеççĕ, инвестицисене илĕртме тĕрлĕ мелсем шыраççĕ, çĕнĕ меслетсемпе усă кураççĕ. Туслă çыхăну йĕркелес тĕллевпе ют çĕршывсенчен килекенсене куллен йышăнаççĕ. Çавăн пек хутшăну экономика çыхăнăвне йĕркелеме пулăшать.

2024 çулта республикăна ют çĕршывсенчен официаллă 24 делегаци килнĕ.

Чăваш Енре «Пĕтĕм тĕнчери коопераци тата экспорт аталанăвĕн система мерисем», «Промышленноç экспорчĕ», «АПК продукцийĕн экспорчĕ» регион проекчĕсем ăнăçлă пурнăçланаççĕ.

- Республика Пуçлăхĕ Олег Николаев Чăваш Енре 2030 çулччен экспорта аталантармалли стратеги планне çирĕплетнĕ. «Çĕршывсен кооперацийĕ тата экспорт» наци проектне 6 çуллăха тăснă. Паянхи тĕп тĕллев - 2030 çулччен экспорта палăрмаллах ÿстересси. Çавăн пекех регион ертÿçи таварсене тиесе ăсатассипе, сертификат илессипе, продукцие туянакана илĕртмелле чĕркессипе çыхăннă тăкаксене саплаштармалли тÿлеве илмелли «Экспорт кешбэкне» ĕçе кĕртме сĕннĕ. Халĕ çак ыйтупа ĕçлетпĕр,- пĕлтернĕ вице-премьер - экономика аталанăвĕн министрĕ Дмитрий Краснов.

Поделиться:
Распечатать