Елизавета Владимирова - талантлă, вĕренÿре тата обществăлла ĕçсенче пысăк çитĕнÿсемпе палăрнă, Чăваш Республикин Пуçлăхĕн стипендине тивĕçнĕ округри 24 çамрăкран пĕри. Вăл П.Х.Бухтулов ячĕллĕ Тăвайри вăтам шкулта 9 класра вĕренет, саккăрмăш çул ача-пăча искусство шкулĕнче пултарулăхне аталантарать.
Хĕрача - «Пĕрремĕшсен юхăмĕн» хастарĕ, волонтер, шкул пурнăçĕн активистки.
2017 çулта ача-пăча искусство шкулĕнчи Галина Николаевна Никонова опытлă педагог патĕнче ăсталăха аталантарса, пысăк çитĕнÿсем тума пуçланă. Тахçанах чапа тухнă «Тайна» ансамбльпе таçта та çитме ĕлкĕрнĕ ĕнтĕ. Сăмах майăн, унăн аппăшĕсем - Лилияпа Екатерина Владимировасем те çак ушкăн солисчĕсем пулнă. Иккĕшĕ те шкулта вĕреннĕ вăхăтра палăрса Чăваш Ен Пуçлăхĕн стипендине тивĕçнĕ. Тата юрлас ăсталăх, халăх йăли-йĕркисемпе кăсăкланас, вĕсене малалла упрас туртăм Тăрмăшри кукашшĕпе кукамăшĕнчен те куçнă пулас.
Е.Владимирова Пĕтĕм тĕнчери, Раççей, регион тата муниципалитет шайĕнчи тупăшусенче палăрма ĕлкĕр- нĕ. Тĕслĕхрен, 2023 çулта кăна халăхсем хушшинчи «Жар-птица России» ?Мускав%, «Дерево-сияние» ?Краснодар%, «Народный артист» ?Санкт-Петербург%, «Осенние таланты» ?Мускав% конкурссенче I тата II степень лауреачĕ пулса тăнă.
2024 çулта Мускавра иртнĕ «Морозко» конкурсра та жюри унăн пултарулăхне питĕ лайăх хак панă. Çак списока малалла та малалла тăсма пулать. Елизаветăпа юлташĕсем юратнă ушкăнпа нумай хула-региона çитсе курнă, наградăсен пухмачĕ те çулсерен пуянланнă, çĕнĕ юлташсемпе паллашнă.
- «Орленок» ача-пăчапа кану лагерĕнче пулни тарăн йĕр хăварчĕ пирĕнте. Ачасене аталанма ялта çакăн пек искусство шкулĕ пурри те чăн-чăн пуянлăх. Юсав тунă хыççăн тата та хĕпĕртесе çÿретпĕр. Ачасен малашлăхĕшĕн тивĕçлĕ условисем туса пама тăрăшнăшăн тав тăватпăр,- тет республика стипендиачĕ.
Елизавета Владимирован девизĕ - ырă ĕçсемпе кăна пурнăç илемлĕ. Паллах, малтанхи утăмсем хăюсăртарах пулнă пулсан, халĕ искусство тĕнчи çав тери пуяннипе тĕлĕнтерет. Юрă-ташă урлă тĕрлĕ шухăш-туйăма кăтартма пулнине пĕлтерет. Çавăн пекех маттур хĕрача вулама юратать. Пахчари ĕçсенчен чечек акса-ÿс- терме, хăяр çитĕнтерме кăмăллать.
Е.Владимирова малашлăхне те, Лилия аппăшĕ пекех, хăй суйласа илнĕ культура çулĕпех çыхăнтарма тĕллев лартнă.
Раиса ШУМОВА
