Элпуç каччи Анатолий Алексеев Запорожье енче хамăр ентешсемпе пĕрле нацистсене хирĕç кĕрешет. Стрелок вăл. Раççей Президенчĕн указĕпе мобилизаци йĕркипе 2022 çулта çар ретне тăнăранпа çар участникĕн удостоверенине илнĕ.
Анатолий Владимировичăн кăкăрне ытти медальсем те илĕртеççĕ. Жуков медалĕ хыççăн, акă, 2024 çулта «Хăюлăхшăн» тивĕçнĕ. Ашшĕ- пе амăшĕ, Владимир Васильевичпа Алина Анатольевна, Çĕнĕ Шупашкарти аппăшĕн çемйи, ытти тăванĕсем мăнаçланаççĕ Анатолийăн паттăрлăхĕпе. Çавăн чухне июль уйăхĕнче татти-сыпписĕр персе тăракан çапăçу хирĕнчен аманнă взвод командирне илсе тухнă, вилĕмрен çăлса хăварнă вăл. Юлташĕсене те хăюлăхĕпе тĕлĕнтернĕ. «Уçă кăмăллă, йывăрлăхра ялан пулăшма хатĕр»,- калаççĕ ун пирки çĕршыв чысне пĕрле хÿтĕлекен ентеш-паттăрсем.
Шкулта вĕреннĕ вăхăтрах çирĕп вăй-халĕпе палăрса тăракан çамрăк футболла выляма, йĕлтĕрпе чупма кăмăлланă, тав хучĕсене темиçе хутчен тивĕç пулнă. Тăхăр класс хыççăн Канашри транспортпа энергетика техникумĕнче газоэлектросварщике вĕреннĕ чухне те спортпа туслă пулса пиçĕхтернĕ хăйне. Ахальтен мар хĕсмете Ленинград облаçĕнчи çарпа космос вăйĕсен тытăмне илнĕ. Унтан Шупашкарти строительство комбинатне сварщике вырнаçнă. Килĕш-терсе, хисеплесе пурăнакан çемьере ÿснĕ каччăн камран тĕслĕх илмелли пулнах. Ашшĕ, право хуралĕнче районти лăпкă лару-тăрушăн тăрăшса канăва тухнăскер, ывăлне яланах малалла ăнтăлма хавхалантарнă. Больницăра тирпейлÿçĕре вăй хуракан амăшĕн ывăлĕшĕн кĕл туман кунĕ та иртмест. Ашшĕ-амăшĕн чун ăшшипе çитĕннĕ ывăлне ĕненÿпе шанчăк парса тăраççĕ вĕсем пурте.
Кăрлач уйăхĕнче Анатолий тăваттăмĕш хут отпускра пулнă. Эл ен тăрăхĕнче ыр кăмăллăх ĕçне нумай ял хастарĕ, волонтерсем хутшăннине курса хавхаланнă. Чун ыйтнипе маскировка тетелĕ çыхаççĕ, окоп çуртисем тăваççĕ. Мĕн кирлине пĕрлехи вăйпа пухса парса яраççĕ. Салтаксем тенĕрен, ытларахăшĕ - чăвашсем кунта, Тăвай тăрăхĕнчен те нумай. «Чăвашла калаçатпăр, çакă та тăван килпе çывăххăн туйтарать»,- терĕ вăл.
Тыл çирĕп пулсан, фронт та вăйлă. Хÿтĕлевçĕ ентешсем хăйсемшĕн тăрăшнине питĕ хаклаççĕ, Анатолий ырă ĕç тăвакансене тав тунă.
«Эпĕ - салтак, пурте йĕркеллĕ пулать. Маншăн ан пăшăрханăр, аттепе анне. Çĕнтерÿпе таврăнатпăр!»- çапла каласа сывпуллашнă çывăх çыннисемпе.
Чĕрĕ-сывă, киле çĕнтерÿпе таврăнма пилленĕ ашшĕпе амăшĕ отпуск хыççăн çула тухнă ывăлне.
Раиса ШУМОВА
