Нарăс уйăхĕн 26-мĕшĕнче пултаруллă та талантлă педагогика ĕçченĕсенчен, шкул ертÿçисенчен пĕри - Валентин Федорович Демидов çуралнăранпа 95 çул çитрĕ. 15 çул каялла вăл пурнăçран уйрăлнă пулин те унăн пархатарлă ĕçĕсем паян та халăх асĕнче.
Валентин Федорович 1930 çулта Лачкасси ялĕнче çуралнă. Шкултан вĕренсе тухсан чи малтанах Канаш хулинчи педагогика училищинче пĕлÿ пухнă, унтан Шупашкарти учительсен институтĕн- че вĕренсе вырăс чĕлхипе литература вĕрентекенĕн дипломне илнĕ.
1949 çулта Новосибирск облаçĕнчи Пичуровскри 7 çул вĕренмелли шкулта ачасене вырăс чĕлхипе литературине вĕрентнĕ.
1951-1954 çулсенче совет çарĕн ретĕнче хĕсметре тăнă. 1954-1965 тата 1968-1995 çулсенче Чÿкçырми ялĕнчи сакăр çул вĕренмелли шкул ертÿçинче тата истори вĕрентекенĕн-че ĕçленĕ. Хăйĕн ĕçне лайăх пĕлекен В.Демидов коллективпа пĕрле шкула юсассипе, çĕнĕ çуртсем лартассипе ырми-канми вăй хунă, вĕрентÿре кирлĕ пособисем, мастерскойра ĕçлеме тĕрлĕ инструментсем нумай туяннă... Мал ĕмĕтлĕскер хăй пĕлĕвне ÿстерсех пынă. Вăл 1958 çулта Шупашкарти педагогика институчĕн вырăс чĕлхипе литература, 1964 çулта истори факультечĕсенчен вĕренсе тухнă.
1965-1968 çулсенче Тăвайри райĕçтăвком председателĕн çумĕ пулнă. 1967 çултанпа Чÿк-çырминчи краеведени музейĕн ертÿçи те. Валентин Федорович çак музея Чÿкçырмипе Вăрманхĕрри халăхĕ-пе тачă çыхăнура пулса хăй йĕркелесе янă. Çулсерен музей пуянланса пынă. Часах республикăра кăна мар, унăн тулашĕнче те палăрнă. Унта 15 пин экспонат пулнă. Çав вăхăтра çĕршывăн тĕрлĕ кĕтесĕсенчен Чÿкçырми музейне курма çÿренĕ. 1982 çулта вăл «СССРти питĕ лайăх шкул музейĕ», «Раççейри халăх музейĕ» ятсене тивĕçнĕ. Валентин Демидова хăйĕн ĕçне чуна парса пурнăçланăшăн «Çут ĕç отличникĕ» паллăпа чыс тунă, «Чăваш АССР тата РСФСР тава тивĕçлĕ учителĕ» хисеплĕ ятсене панă.
Ĕçленĕ хушăра Валентин Федорович вĕрентÿпе воспитани ыйтăвĕсемпе 60 ытла статья, тĕрлĕ тĕпчев ĕçĕ çырнă, кĕнекесем пичетлесе кăларнă. Çак тапхăртах паха опыт пухнă Чÿкçырми шкулĕн ертÿçипе вĕрентекенĕ- сем тăрăшнипе чылай çамрăк пурнăç çулĕ çине тăрса пысăк ÿсĕмсем тунă. Вĕсем çĕршывăн тĕрлĕ кĕтесĕ-сенче вăй хурса паянхи кун та Тăвай ен, Чăваш Республикин, Чÿк- çырмипе Вăрманхĕр-ри ялĕсен чысне çÿле çĕклеççĕ.
Шел пулин те, 2010 çулхи кĕркунне вăл пурнăçран уйрăлнă. Унăн сăваплă ĕçĕ-хĕлĕ ĕмĕрлĕхех çамрăк ăрăва Тăван çĕршыва, çуралнă кĕтесе тата та ытларах юратма, хисеплеме вĕрентĕ. Пĕтĕм ĕмĕрне тăван халăха вĕрентес, воспитани парас ĕçре ирттернĕ çын яланах пирĕн- шĕн ырă тĕслĕх вырăнĕнче юлĕ, этем ырлăхĕшĕн вăй-хала шеллемесĕр ĕçлеме хавхалантарĕ.
Ирина НИКОЛАЕВА,
чăваш чĕлхипе литературине
вĕрентекен, Тăвай шкулĕ
