Çак кунсенче АПК ветеранĕсен республикăри Союзĕн Тăвай округĕн-чи уйрăмĕн членĕсем унăн ертÿçи Н.И.Иванов пуçарнипе Шупашкарти «АККОНД» кондитер предприятине çитсе курчĕç.
Тăвай тăрăхĕн паллă çынни, акционерсен обществин генеральнăй директорĕ В.Н.Иванов ентешĕсене ăшă кăмăлпа кĕтсе илчĕ. Çавра сĕтел хушшинчи калаçу вăхăтĕнче Валерий Николаевич кондитер фабрикин историйĕ тата ку чухнехи ĕçĕ çинчен каласа пачĕ.
Пылак çимĕçсен производствине çĕршывшăн кăткăс тапхăрта - 1943 çулхи август уйăхĕнче хута янă. Производство хăвачĕ çав вăхăтра çулталăкне 120-140 тонна продукци кăларма май панă. Паян вара «Акконд» общество Чăваш Енри чи пысăк предприятисенчен пĕри. Изделисен вырăнта хатĕрленĕ рецептури, чĕртавар пахалăхне контрольте тытни, инновациллĕ оборудованипе усă курни çĕршывĕпех паллă продукци кăларма майсем туса парать. Хальхи вăхăтра фабрикăра 500 ытла тĕрлĕ продукци - десертсем, канфет, вафли, печени тата ытти те туса кăлараççĕ. Пылак çимĕç Раççейри регионсене кăна мар, ытти çĕршывсене те ăсанать.
Пире, экскурсие пынисене, вафлисемпе десертсем тата печенисем туса кăларакан цехсемпе паллаштарчĕç. Конвейер линийĕсем пĕр тикĕс- сĕн ĕçлеççĕ, пĕтĕмпех автоматизациленĕ. Апла пулин те, ятарлă тум тăхăннă çынсем те нумайăн тăрăшаççĕ.
Фабрика специалисчĕсем экскурсие кăсăклă та кăмăллă ирттерме тăрăшрĕç.
«Акконд» акционерлă общество 2006 çулта «Техсервис» ОАО никĕсĕ çинче «Акконд-агро фирма» ХАО йĕркеленĕ. Учредителĕ - «Акконд» акционерсен уçă обществи. Тĕп çул-йĕре тырă, сĕт тата аш туса илессинче палăртнă. Халĕ вара «Акконд-агро фирма» общество - пирĕн округри малта пыракан предприятисенчен пĕри. Тĕслĕхрен, 2024 çулта аккондçăсем 8225,9 тонна сĕт туса илнĕ, ку кăтарту умĕнхи çулхинчен чылай пысăкрах.
2010 çулхи декабрь уйăхĕнче сĕт-çу ферминче туса илекен сĕт продукцине ĕçлесе хатĕрлекен цеха хута янă. Ку предприятие 62 млн тенкĕ инвестицисем хывнă пулнă. Паян «АККОНДМОЛОКО» ОООн пахалăхлă продукцийĕпе куллен-кун усă куратпăр, вăл Раççейри куравсенче те малти вырăнсене çĕнсе илнĕ. Регион тулашĕнчи магазинсене те саланать.
Кондитер фабрикинчи питех те кăсăклă экскурси хыççăн ветерансен делегацийĕн ертÿçи Н.И.Иванов Тăвай тăрăхĕнче ял хуçалăх предприятийĕсен руководителĕнче ĕçленисен ячĕпе Валерий Николаевич Иванова Тав çырăвĕпе асăнмалăх парне парса чысларĕ. Хамăрăн пултаруллă ентеш ертсе пыракан предприяти пысăк калăпăшлă инвестицисем хывса тăван тăрăха аталанма лайăх майсем туса панине палăртнă Çырура.
Район юбилейĕ умĕн йĕркеленĕ çулçÿрев аслă ăру çыннисен кăмăлне çĕклерĕ, асра юлчĕ.
Людмила ПАВЛОВА
