Михаил Павлович Желтов (1945-2021 ç.ç.) - философи наукисен докторĕ, СССР Журналисчĕ- сен тата Раççей Писателĕсен союзĕн членĕ - çуралнăранпа 80 çул.
Вăл 1945 çулхи февралĕн 19-мĕшĕнче Сăхăтпуç ялĕнче çуралнă. Ялти 7 çул тата Тăвайри вăтам шкултан вĕренсе тухсан «Красный Октябрь» колхозра ĕçленĕ. 1965-1968 çулсенче çар службинче тăнă, техника çарĕнче ĕçпе ĕç укçи инженерĕ пулнă.
1968-1975 çулсенче Чăваш патшалăх университетĕнче электротехника факультетĕнче вĕреннĕ. Аслă пĕлÿ илсен кĕçĕн наука сотрудникĕ пулса университетри наукăпа тĕпчев секторĕнче вăй хунă. Михаил Павлович Шупашкарти приборсем тăвакан заводра аслă инженер-электрикре ĕçленĕ, унтан информаципе шутлав центрне куçнă. 1984-1999 çулсенче - Чăваш радиопа телевидени комитечĕн редакторĕ. «Коммунизм ялавĕ» хаçатра ĕçленĕ. «Ял ĕçченĕ» хаçатра та унăн нумай хайлавĕ пичетленнĕ. ЧПУра студентсене вĕрентнĕ.
Ĕçленĕ хушăрах литература ĕçне кÿлĕннĕ. «Ют çынлăх çаранĕ» - малтанхи сăввисенчен пĕри. «Хатĕр пул» журналта пичетленнĕ хайлавĕсем.
«Алтăр çăлтăр шерпечĕ», «Асамлă алгоритм», «Аçа çапнă чун», «Хĕвел çутипе килетĕп», «Хура тум», «Где ты, Афина» тата ытти кĕнекесем кăларнă.
