Тĕмер территори уйрăмĕнчи 8 тыл ĕçченне «1941-1945 çулсенчи Тăван çĕршывăн Аслă вăрçинче çĕнтерÿ тунăранпа - 80 çул» юбилей медалĕпе наградăланă. Округ администрацийĕн пуçлăхĕ Олег Ломоносов, ял тăрăхĕн специалисчĕ Светлана Ярхунова, Ирина Краснова округ депутачĕ килĕсене кайса саламланă сумлă ватăсене.
Тĕмер ялĕнче пурăнакан 101 çултан иртнĕ Юлия Ивановна Чумышева хăнасене ăшшăн йышăннă. 18 çулхи Юлия вăрçă нуши-терчĕ витĕр тухнă, вĕренме пăрахса окоп чавма хутшăннă. Вăрçă ветеранĕ-пе, хăй пекех библиотекарьте ĕçлекен Александр Чумышев фронтовикпа çемье çавăрнă. Ăс-тăнпа пурăнать, кĕнеке, район хаçачĕ вулать. Шкул ачисене те, шыравçăсене те йышăннă.
- Хисеплĕ Юлия Ивановна, сирĕн пархатарлă та мухтавлă кун-çулăр çитĕнекен ăрушăн ырă тĕслĕх. Ăшă кăмăл, лăпкă кун-çул сире,- тесе награда панă Олег Анатольевич.
Çавăн пекех Тĕмер ялĕнчи Мария Архиповна Николаева, Иван Прокопьевич Краснов (сăн ÿкерчĕкре), Таисия Архиповна Баринова, Антонина Антоновна Манишева, Амалăх ялĕнчи Ольга Николаевна Максимова, Анастасия Тимофеевна Ильина, Нина Алексеевна Шатунова ĕç ветеранĕсене юбилей медалĕ-семпе чысланă.
Раиса ШУМОВА
