Начарланма ĕмĕтле-нетĕр-и? Рационран сиенлĕ çимĕçсене çеç кăларма сĕнетпĕр.
Чипс. Çĕр улми питех усăллă мар, унра крахмал нумай. Чипсра вара усăллă япаласем пачах çук, унра канцерогенсем, ароматизаторсем, çимĕç тутине вăйлатакан япаласем, çу нумай. Чипс пĕрмай çисен усал шыçă аталанма пултарать, мăнтăрланасси те инçех мар. Çĕрулми-фри пирки те çакнах каламалла.
Газлă пылак шыв. Пĕ-летĕр-и: шыва гуашь, сахăр ярса ĕçсен те газировка пек сиенлĕ пулмĕ. Кун пек шывсенче сахăр питĕ нумай.
Майонез çиме пăрахăр! Сăмах лавккара туянни пирки пырать. Ăна çимесен пилĕк çинçелнине туятăр. Кетчуп, тĕрлĕ соус пирки ан манăр. Вĕсенче те тутта вăйлатакан япаласем, ароматизаторсем, çусем пур. Вĕсен вырăнне çуллă мар хăйма çиме юрать.
Сахăр тата тăвар сахалрах çимелле. Вĕсене «шурă вилĕм» теççĕ. Тăвар организмри шыва кăларма чăрмантарать. Сахăр вара — начарланакансемшĕн пĕрремĕш тăшман. Паллах, вĕсене пач çимесĕр пурăнаймастăр, анчах виçине чакарăр. Сахăр вырăнне пыл пур, ав.
Эрех сиенĕ пирки каламалла та мар ĕнтĕ — хăвăрах пĕлетĕр.
Кăлпассине, тĕтĕмленĕ çимĕçсене мĕнрен тунине эсир нихăçан та пĕлес çук. Аш-какая тĕтĕмлени, тăварлани ăна вăрах упрама май парать. Паллах, вĕсенчен усси сахал.
Маргаринпа, тип çупа ăшалани çимĕçĕн пĕтĕм усăлăхне пĕтерет. Çитменнине, канцерогенсем пулаççĕ.
