• Виçĕ паттăрлăх орденĕн кавалерне Александр Тихонова Президентăн Федерацин Атăлçи округĕнчи полномочиллĕ Представителĕн должноçне çирĕп- летнĕ. Вăл РФ Президенчĕ Владимир Путин пуçарнă, Президент академийĕн патшалăх управленийĕн «Паттăрсен вăхăчĕ» проектне хутшăннă малтанхи йышран. Елчĕк районĕнчи Тăрмăш ялĕнче çуралнă.
• Раççей МЧСĕ пĕлтернĕ тăрăх, 2024 çулта республикăра чрезвычайлă лару-тăру шучĕ (3) икĕ хут пĕчĕкленнĕ. Пушарсен хисепĕ чакнă, 2024 çулта — 1419, 2023 çулта 1517 пушар, Тăвай енре пĕлтĕр — 16, виçĕмçул 23 пушар пулнă .
Шыв-шур çинчи инкексен шучĕ хушăннă (35—29). Чрезвычайлă лару-тăрура, пушарта, шывра 94 çын пурнăçĕ татăлнă. 2024 çулта пĕрлехи «112» номерпе оперативлă службăсемпе васкавлăн çыхăнмалли тытăма 718,8 пин е кашни талăкра 2 пине яхăн хут телефонпа шăнкăравланă.
• Регион сегменчĕн дежурнăйĕ-сен ушкăнĕ ĕçлеме тытăннăранпа пилотсăр 1078 аппарата тупса палăртнипе, республика еннелле вĕçсе килнипе çыхăннă хăрушлăх пурри çинчен 218 информаци илнĕ.
• Шупашкарти 1-мĕш маршрут çинчи çĕнĕ 40 троллейбус кивĕ транспорта улăштарнă. Вĕсене çула старт панă çĕре Чăваш Ен Пуçлăхĕ Олег Николаев та хутшăннă. 2020 çултанпа киввисен вырăнне çĕнĕ 221 троллейбус туяннă. Хулари 1-мĕш троллейбус маршрутне 1964 çулхи ноябрĕн 7-мĕшĕнче уçнă, Шупашкарти чи вăрăммисенчен тата халăх йышлă çÿрекеннисенчен пĕри. Иртнĕ çул 11 млн яхăн пассажира турттарнă.
• «Хамăрăннисене пăрахмастпăр!» акцие пуçарнăранпа Чăваш Енре пурăнакансемпе предприятисем «Чăваш Ен аталанăвĕн «Пĕрле» фондне 97 млн тенкĕ ытла укçа куçарнă. Çак ыркăмăллăх ĕçĕнче Тăвай округĕнчи çынсем те хастарлăх кăтартаççĕ.
• 2024 çулта Республикăри кардиодиспансерта телемедицина консультацийĕсен пĕтĕмĕшле шучĕ 4 пинрен иртнĕ. Вĕсенчен 574-шне диспансер ыйтнине федераци клиникисем пурнăçланă, умĕнхи çулхинчен 150 тĕслĕх ытларах. Диспансер специалисчĕ-сем районти медицина организацийĕсене 3300 ытла консультаци панă, умĕнхи çулхинчен пин тĕслĕх нумайрах.
• Республикăра кăçалхи пĕр-ремĕш йĕкĕреш Канашри Семеновсен çемйинче çуралнă. Арçын ачапа хĕрача 3000 грамран кăшт ытларах çут тĕнчене килнĕ. Вĕсен пĕр хĕр пур. Çапла нумай ачаллă çемье пулса тăнă.
• Çамрăк авторсем валли «Çĕнĕ ятсем уçатпăр. Открываем новые имена» литература конкурсĕ пырать. Унта хутшăнма 15—35 çулсенчи çамрăксене йыхравлаççĕ. Пултарулăх ĕçĕсене чăвашла та, вырăсла та йышăнаççĕ, хайлавсене пичетлесе е электрон мелĕ-пе тăратмалла, вĕсене мартăн 1-мĕшĕччен йышăнаççĕ. Номинацисем: «Проза», «Поэзи» тата «Драматурги».
• Кăçал Чăваш Енре сывлăх сыхлавĕн тепĕр 10 объекчĕ хута каймалла, 9 модуль конструкцине пуçтарма тата 51 объекта тĕпрен юсама палăртнă.
• 2024 çулта республикăра 2,6 пин юридици сăпачĕ тата çĕр-çĕр çын 2023 çулшăн пурлăхшăн налук тÿлемелли çăмăллăхпа усă курнă. Çавна май организацисем 719 миллион ытла тенкĕлĕх çăмăллăх илнĕ, граждансем — 352 миллион тенкĕ.
