Муниципалитетсенче 2025 çулта палăртнă пуçаруллă бюджет проекчĕсене пурнăçлама пуçланă. Вĕсемпе ĕçлемелли пирвайхи контрактсене алă пуснă.
Премьер-министр тивĕçĕсене пурнăçлакан, ял хуçалăх министрĕ Сергей Артамонов пĕлтернĕ тăрăх, кăçал республикăра пуçаруллă бюджет шучĕпе 1555 проекта тÿрре кăлармалла. Республикăн çак программи ĕçлеме пуçланăранпа кунашкал пысăк кăтарту халиччен пулман. Граждансен пуçарăвĕсем çинче никĕс- леннĕ ĕçсем валли кăçал 3,3 миллиард тенкĕ уйăрĕç.
Кăçалхи пирвайхи контрактсене подрядчиксемпе чи малтан Тăвай округĕнче алă пуснă. Унта Элпуç ялĕнчи Тăван çĕршывăн Аслă вăрçин салтакĕсене чысласа лартнă стенана хăтлас, темиçе ялти çулсене юсас тата урамсене çутатса тăмалла тăвас, Тăвайри ачасен вăйă площадкине йĕркелес енĕпе, ытти объектра камсем ĕçлессине татса панă.
