Тăвайри Михайловсен пысăк çемйинчен вăрçа виççĕнтен кайни çинчен «Ял ĕçченĕ» хаçатăн иртнĕ номерĕсенче çырнăччĕ. Ашшĕ Кузьма Михайлович, ывăлĕсем - Иван тата Герман. Манăн аслă пичче çинчен тĕплĕнрех пĕлтерес килет.
Герман Кузьмич Михайлов 1924 çулхи сентябрĕн 15-мĕшĕнче Тăвай ялĕнче çуралнă. 1940 çулта 10 класс вĕренсе тухса аттестат илнĕ. 1941 çулхи апрель уйăхĕнче çамрăк каччăна çар службине илеççĕ, комисси çирĕп- летĕвĕпе Улатăрти аэроклуб курсанчĕ пулса тăрать, кайран Мускаври авиаци шкулĕнче вĕренет.
Çар билечĕ çинче çырни тăрăх çулăмлă вăрçă çулĕсемпе паллашма пулать: «С марта 1943 г. по май 1945 г. участвовал в Великой Отечественной войне в составе 204-го отд. корректорно-разведовательного авиаполка, 312-го штурмового авиаполка.
1942 г. сентябрь - 1943 г. март - пилот авиа- истребительного полка.
1943 г. март - 1945 г. февраль - пилот разведполка.
1945 г. февраль - 1946 г. январь - старший пилот.
1946 г. январь - 1946 сентябрь - начальник клуба эвакогоспиталя».
Сывлăшра та, çĕр çинче те йĕри-тавра вăрçă пынă. Тинĕсре те салтаксемшĕн канлĕ кун пулман. Пĕртăвансем çапăçу хирĕнче пур енчен те маттур пулнă. Герман Кузьмичăн çар наградисем хушшинче «Кенигсберга илнĕшĕн», «Варшавăна ирĕке кăларнăшăн», «Германие çĕнтернĕшĕн» медальсем пулнă.
Тĕлĕнмелле те, анчах факт, Кузьма Михайлович тата ывăлĕсем Иванпа Герман виççĕшĕ те, Европăна тăшмансенчен ирĕке кăларнă çапăçусене хутшăннă, медаль ячĕсем те пĕр пек вĕсен. 1945 çулхи май уйăхĕн- че вĕсем пĕр тăрăхри вырăнсенче, юнашар тенĕ пекех çапăçнă иккен: сапер, артиллерист, летчик. Анчах шел те, пĕр фронтра пулнине пĕлмен - камран ыйтăн;
Герман Кузьмич Тула облаçĕнчи Белев хулинче пурăннă. Фотографра ĕçленĕ. Çемйи: арăмĕ Анна, икĕ йĕкĕреш Надьăпа Вера хĕрĕсем, Александр ывăлĕ. Паянхи кун хĕрĕ, мăнукĕсем, кĕçĕн мăнукĕсем Тула хулинче пурăнаççĕ.
Вăрçă паттăрĕ Г.К.Михайлов 1977 çулхи августăн 4-мĕшĕнче вилнĕ. Вил тăприне Тăвай ялĕн масарĕ çине илсе килнĕ, тăванĕсемпе юнашар хĕрлĕ çăлтăрлă палăк лартнă.
Çутă мирлĕ тÿ-пешĕн, телейлĕ пурнăçшăн эпир Тăван çĕршывăн Аслă вăрçин ветеранĕсене тав тăватпăр. Сирĕн паттăрлăхпа хастарлăхăр иксĕлми. Паянхи Раççей салтакĕ-сен умĕнче те пуç таятпăр.
