... Пĕчĕк ача амăшĕ еннелле туртăнать. «Анне, аннеçĕм!»— чĕнет вăл амăшне. Куçа уçатăп, тĕлĕкре иккен эпĕ.
... Аннеçĕм, юратнă аннеçĕм, эсĕ çĕре кĕни 40 çул çитрĕ ĕнтĕ. Кĕçех санăн çуралнă кун. Эсĕ ман умра тăратăн. Санăн шуралнă çÿçÿ, нумай асап, хурлăх тÿснипе пĕркеленнĕ питÿ, ĕçре пиçĕхнĕ хыткан аллусем те куç умĕнчех. Сурсах ыратакан чĕреме ăшăран-ăшă куллу савать. Анне, санăн шанса тинкерекен сенкер куçусенчен пăхса каçару ыйтатăп.
Аннеçĕм, каçарсам мана, каçарсам. Кÿрентернĕ те пулĕ сана, сивĕ сăмахсем те каланă пулĕ. Анчах эсĕ чăтнă, кăштах ятласа илнĕ те, лăпланнă. Айван «чĕппÿсем» çакăншăн сана кÿренме те хăйнă ĕнтĕ. Хаклă аннеçĕм, халĕ вăрç мана. Ăнланам, сана пире ÿстерме йывăр пулнине. Чĕнместĕн, мĕншĕн чĕнместĕн?
Эпĕ, санăн кĕçĕн хĕрÿ, 40 çул каялла аслă шкултан вĕренсе тухрăм. Ман умра халь анлăран та анлă çул. Инçете тăсăлать вăл. Çав çулпа утма йывăр мана сансăр, хаклăран та хаклă аннеçĕм. Анчах эп каялла чакмăп, эс вĕрентсе каланисене асра тытса утăп та утăп малалла. Ачаш чĕппÿшĕн пăшăрханма кирлĕ мар, анне.
Нумаях пулмасть (тĕлĕкре) пуçăмран ачашларăн та çухалтăн... «Анне, ан кай, килсем, самантлăха та пулин килсем, калаçар. Вĕрент, ăс пар мана!»— çапла калаçса вăранса кайрăм.
Эсĕ килмерĕн. Юрĕ, канма кансĕрлемĕп сана. Йывăр тăпру çăмăл пултăр. Мана манса ан кай, тĕлĕкре те пулин килсе кай. Эпĕ хамăн пурнăç çинчен каласа кăтартăп, эпĕ йăнăш çулпа утасран асăрхаттарсах тăрăн эсĕ мана.
Аннесен ахахран та хаклă чĕрисене упрасчĕ пирĕн, питĕ упрасчĕ.
Кĕтетĕп сана, аннеçĕм, яланах кĕтетĕп.
Альбина АЛЕКСАНДРОВА
