Ăрусен çыхăнăвне туйса тăни хавхалану кÿрет пулĕ Римма Антоновна Гуринана. Ăна пĕлмен çын сахал-тăр. 2003 çултанпа Тăвай тăрăхĕнчи ĕçпе вăрçă ветеранĕсен Совечĕн председателĕ вăл. Яланах халăх хушшинче, мероприятисенче куратăн ăна. Юбилярсене сума сумалла, йывăрлăха лекнисене пулăшмалла, çамрăк ăрупа тĕлпулăва е патриотла ĕç-хĕле хутшăнмалла, ГТО нормативне пурнăçламалла...
Пурне те каласа пĕтерес çук. Акă, иртнĕ эрнекун Тăвай районĕн 90 çулхи юбилей уявĕнче икĕ хутчен тухрĕ сцена çине. Çак илемлĕ сăн-питлĕ хĕрарăма кам-ха 78 çулта тесе калĕ? Ветерансен хо- рĕпе хăнасене илемлĕ юрăсем парнелерĕç. Кунти юрăç-волонтерсем — социаллă пулăшу центрĕ çумĕнчи «Хастар ватлăх» клуб членĕсем. Хăй аслă ăру çыннисене пĕр чăмăра пухма хутшăннăшăн савăнать. Çак уяврах Римма Антоновнана общество пурнăçĕнчи активлăхĕшĕн Чăваш Республикин Патшалăх Канашĕн Хисеп грамотине парса чысларĕç.
Ĕçе çÿренĕ пекех çÿреççĕ хĕрарăмсем ыр кăмăллăх ушкăнне. Р.А.Гурина хăй те пĕрле ятарлă çар операцийĕнчи ентешсене пулăшса маскировка тетелĕ-сем, шлем çийĕн тăхăнмалли калпаксем çыхма, окоп çуртисем, чей пакечĕсем хатĕрлеме хутшăнать. «Çĕнтерĕве çывхартма фронтпа тылăн пĕрле пулмалла»,— тет вăл калаçăва малалла тăсса.
Р.Гурина 1947 çулта Амалăх ялĕнче фронтовик кил-йышĕн- че çуралнă. Ял хуçалăх институтĕнче агронома вĕреннĕ хыççăн çак специальноçпа «Победа» совхозра, Свердлов облаçĕн- че ĕçленĕ. Тăван тăрăха таврăнсан, ял хуçалăх управленийĕнче агроном-химикре, тĕп экономистра, райадминистрацин экономика, пурлăхпа çĕр хутшăнăвĕсен управленийĕн начальникĕнче тăрăшнă.
Римма Антоновнапа кăçалхи Çĕнтерÿпе патриотизм çулталăкĕ, Аслă çĕнтерĕвĕн 80 çулхи юбилейĕ пирки сăмах пуçарсан сăн-питĕнче темĕнле хĕрÿлĕхе асăрхарăм.
— Мăнаçланса, хавхаланса йышăнтăм паллă юбилей çулталăкне. Майăн 9-мĕшĕ — пирĕн çемьешĕн яланах чи пысăк праçник пулнă, халĕ те çаплах. Аттепе анне пире, 4 ачине, çĕршыва юратма, вăрçă ветеранĕсене хисеплеме, пулăшма вĕрентсе ÿстернĕ. Çакă ламран лама малалла та куçса пырĕ тесе шутлатăп,— терĕ фронтовик хĕрĕ.— Çĕнтерÿ кунĕнче Мухтав монуменчĕ е ытти çĕрти палăк умĕнче, митингра сăмах калатăп-и, пирĕн мирлĕ пурнăçшăн кĕрешнисен умĕнче пуç тайнă чух куç умне юратнă атте, çĕршыва хÿтĕлекенсен сăнĕ-сем тухаççĕ. Атте ачисемшĕн те, ялти çамрăксемшĕн те патриотизмăн чăн-чăн тĕслĕхĕ пулнă.
Антон Васильевич Журавлев вăрçă суранĕсене пула 66 çула çитсе çĕре кĕнĕ. Хĕрлĕ Çăлтăр, Аслă Отечественнăй вăрçă I тата II степень орденсене, нумай медале тивĕç пулнă çар командирĕ. Миçе çĕршыва, хулана ирĕке кăларма хутшăнман-ши? Вăрçăри терт-нушана чăтса ирттернĕ. Салтак гимнастеркине хывсан юхăннă хуçалăха ура çине тăратма чи йывăр та яваплă ĕçсене шаннă ăна. Партин Тăвай райкомĕнче, хуçалăх председателĕнче, хатĕрлев кантурĕн директорĕнче ĕçлесе хăй хыççăн ырă ят хăварнă.
— Хамăн атте пек салтаксен иртнĕ вăрçăри тата паянхи хÿтĕлевçĕсен паттăрлăхне çамрăк ăру патне çитерес килет. Нихăçан та ан манăçтăр. Пире вăрçă кирлĕ мар, тÿпе яланах янкăр та таса тăтăр,— тет ĕç ветеранĕ.
Гуринсем хăйсен ачисене те, хĕрпе ывăлне, патриотлăх туйăмĕ çинче воспитани парса ÿстернĕ. Вĕсем кооператив институтĕнче вĕренсе пĕлĕвне бухгалтери ĕçĕпе çыхăнтарнă. 4 мăнукĕ мăн кукашшĕн хăюлăхĕпе, хастарлăхĕпе мăнаçланаççĕ. Шел, Римма Антоновнан мăшăрĕн, СХТра инженерта, çамрăксене водитель-тракторист профессине вĕрентнĕ Петр Якимович Гуринăн кун-çулĕ кĕске пулчĕ.
Римма Антоновнан ĕçшĕн чысланă Хисеп хучĕсем пирки маларах та сăмах пулчĕ-ха. 2015 çулта Чăваш Республикин Хисеп грамотипе наградăлани пысăк хаклав пулнине палăртрĕ ветерансен пысăк ушкăнне ертсе пыракан хĕрарăм. Пĕлтĕр Муркаш округĕнче иртнĕ ветерансен республикăри форумĕнче Тăвай маттурне Генрих Васильев ветерансен Пĕтĕм Раççейри организацийĕн Хисеп хучĕпе хавхалантарнă. «Ĕçпе хÿтĕлеве хатĕр» физкультурăпа спорт комплексĕн нормативне кĕмĕл медальпе парăнтарнине палăртса хăварас килет. Тăвай округĕнчи ветеран-волонтерсен ячĕпе СВОри çар командованийĕнчен темиçе хутчен те Тав çырăвĕ килнĕ. Çакăнта та Р.А.Гуринан тÿпи пысăк, паллах.
