Иртнĕ вырсарникун, мартăн 2-мĕшĕнче, районти строительство ĕçне пысăк тÿпе хывнă Валентин Иванович Филиппов çуралнăрапа 85 çул çитрĕ. Вăл 1940 çулта Çăлпуç ялĕнче çуралнă. Пурнăçне мĕн çамрăкран строительствăпа çыхăнтарнă.
Тăвайри вăтам шкула вĕренсе пĕтернĕ хыççăн Сĕнтĕрвăрри техникумĕн- че строитель профессине алла илнĕ. Техникум пĕтерсен пĕр вăхăт районти коммуналлă предприятире техник-строитель пулса ĕçленĕ. 1960—1963 çулсенче Совет çарĕнче пулнă, служба тивĕçĕсене пурнăçланă. Унтан таврăнсан Тăвайри межколхозстройра мастерта тата Тăвайри строительство участокĕн начальник-прорабĕнче тăрăшнă. Çав вăхăтрах малалла вĕренсе пĕлĕве ÿстерме кирлине те лайăх ăнланнă вăл. Ашшĕ те, Иван Филиппович, вăрçă участникĕ, çавна суннă, хальхи пурнăçра вĕренни хисепре, тенĕ. Çапла вара Елена Георгиевна Мюресовапа мăшăрланса çемьеллĕ пулнине пăхмасăрах 1966 çулта Хусанти инженерипе строительство институтне вĕренме кайса кĕнĕ, студент пурнăçĕпе пурăнма тытăннă. Ĕмрипе Тăвайри санэпиднадзор центрĕнче ĕçленĕ мăшăрĕ каланă тăрăх, пĕрремĕш курсра çăмăлах пулман Валентин Ивановича, шкул тата техникум пĕтернĕренпе вăхăт чылай иртни палăрнă. Анчах çине тăнă, хăйне алла илнĕ, тăрăшса вĕреннĕ. Çав вăхăтрах ытти çинчен те манман: институтра вĕреннĕ хушăра унăн икĕ хĕр — Гальăпа Лида çуралнă. Хĕрĕсем ашшĕпе питĕ варлă пулнă, паян кун та юратса аса илеççĕ ăна.
1971 çулта институтран ăнăçлă вĕренсе тухсан Валентин Иванович икĕ çул «Чувашсельстрой» трестăн 400-мĕш номерлĕ мехколонна прорабĕнче вăй хунă.
Валентин Иванович Хусанти аслă шкулта пĕлĕвне тарăнлатнă хушăра Тăвайра 1967 çулта хуçалăхсем хушшинчи «Янтиковская» строительство организацине туса хунă. СМУ начальникне Егор Тимофеевич Васильева (вăл та Çăлпуç ялĕнчен) лартнă. Çулталăкри ĕçсен калăпăшĕ 450—500 пин тенкĕпе танлашнă. Строительствăпа монтаж управленийĕн малтанхи пысăк объекчĕсен шутĕнче — Тăвай ялĕнчи 16 тата 8 хваттерлĕ пурăнмалли çуртсем, Чутейри клуб, «Алдиаровский» совхозри сысна комплексĕ... 1975—1989 çулсенче вара СМУ начальникĕн- че В.И.Филиппов тăрăшнă. вăл Ленинградри инженерипе экономика институтĕнче строительство организаторне те вĕреннĕ. В.И.Филиппов ертсе пынă çулсенче строительство калăпăшне ÿстерессипе пысăк ĕçсем туса ирттернĕ. «Строительствăпа монтаж ĕçĕсен çулталăкри калăпăшне 2,5 миллион тенкĕ-не çитернĕ»,— тесе çырнă 2000 çулта кăларнă «Дела и люди Янтиковского района» кĕнекере. Ку тапхăрта районти культура çуртне, тĕп больницăн, перекет банкĕн, Тăвайри çыхăну узелĕн çурчĕ-сене, спорткомплекса хута янă, ача сачĕсем, шкул çурчĕ-сем, клубсемпе библиотекăсем, пурăнмалли çуртсем тунă, хуçалăхсем хушшинчи сысна самăртмалли «Мир» комплекса, выльăх-чĕр- лĕх витисемпе юсав мастерскойĕ-сем, складсем ĕçе кĕртнĕ. Куратпăр, пурнăç малалла аталаннă, район экономики вăй илсех пынă. СМУ коллективĕ республикăра та хисеплисен шутĕнче пулнă. Хăйĕн 1985 çулхи мартăн 22-мĕшĕнчи Указĕпе Чăваш АССР Верховнăй Совечĕн Президиумĕ В.И.Филиппова «Чăваш АССР тава тивĕçлĕ строителĕ» хисеплĕ ят парса чысланă.
Нумаях пулмасть партипе совет тата хуçалăх ĕçĕсен ветеранĕ М.Я.Яковлев пуçарнипе каменщиксен бригадирĕ Г.А.Дюкин пурăннă çурт çине асăну хăми вырнаçтарчĕç. Унăн бригади шăпах çав çулсенче пысăк хастарлăх кăтартнă.
Кĕçех В.И.Филиппова Тăвай райĕçтăвкомне куçараççĕ. 1989—1992 çулсенче вăл райĕçтăвкомăн архитектурăпа строительство пайне ертсе пырать, 1992 çулхи апрель вĕçĕнчен тытăнса Тăвай район администрацийĕн пуçлăхĕн заместителĕнче ĕçлет. Асăннă должноçсенче те В.И.Филиппов яваплăха туйса тăрăшать, районăн ытти ертÿçисемпе пĕрле строительство, пăрăхсем хывса, газ кĕртес, пурăнмалли çурт-йĕр хăпартас, пурнăç пахалăхне лайăхлатас ĕçсене пысăк тÿпе хывать.
В.И.Филиппов йывăр чире пула 2013 çулхи июнĕн 29-мĕшĕнче пурнăçран уйрăлнă.
Иван ГЛАДКОВ
