Мĕн авалтан аслă несĕлсем Тăван çĕршыва куç шăрçине упранă пек упрама хушнă, вĕрентнĕ. Ку ĕç ламран лама, ăруран ăрăва куçса пырать. Шкулти ĕçченсем пĕлÿ панисĕр пуçне çĕршывăн пулас патриочĕсене кĕçĕн классенченех çивĕч ăс-тăнлă, çирĕп кĕлеткеллĕ, чун-чĕрипе хастар та хăюллă çын тăвас тесе вăй хураççĕ.
Шкулти ачасемшĕн салтаксемпе тĕл пуласси питĕ хумхануллă самант. Чутей шкулĕнче СВОран отпуска килнĕ икĕ салтака — Олег Павловпа Костя Кабартова ура çине тăрса кĕтсе илтĕмĕр. Тĕлпулăва ялти таврапĕлÿçĕ З.Н.Иванова уçрĕ. Вăрçă пуçланни виçĕ çул çитни, Чутей, Амалăх, Ишпуç ялĕсенчи паттăрсем çинчен хумхануллăн каласа пачĕ, видеопроекторпа «Герои нашего времени» презентаци тăрăх вĕсемпе паллаштарчĕ. Çĕршыв ирĕклĕхĕшĕн пуçĕсене хунă С.В.Алексеев, Н.Н.Мулаков, Е.С.Джуманазаров, А.Г.Ефи-мов портречĕсем чĕррĕн курăнса шăплăх «ыйтрĕç».
Вĕсен манăçми паттăрлăхне çирĕплетсе 6 класс ачисем сăвăсем вуларĕç. «Я — русский» юрра 3 класри Кирилл Волков хавхаланса юрларĕ. Пуçĕсене хунă салтаксен тăванĕсем вĕсен кун-çулĕ çинчен каласа пачĕç. О.Г.Ефимова шăллĕне халалласа çырнă сăввинче чун ыратăвне, çывăх çыннине çухатнине палăртрĕ. Залра ларакансем куççÿл- ленмесĕр чăтаймарĕç. Тĕлпулăва килнĕ О.Н.Павловпа К.Г.Кабартов малтан хăйсен çар тивĕçĕ, артиллерипе пехотăри служба çинен каласа пачĕç. Ун хыççăн ачасене пур предметпа та тăрăшса вĕренме кирлине, спортпа туслă пулса вăй-хала тĕреклĕ тумалли, пĕр-пĕрин хушшинче туслăх пулмалли, вĕрентекенсене тав туса хисеплемелли çинчен каларĕç. Икĕ салтака та Жуков медалĕпе наградăланă, ятарлă çар операцийĕн участникĕсен удостоверенийĕ пур вĕсен. Олег шкул çулĕсенчех паллă спортсмен пулнă. Костя 8 класс хыççăн Ульяновскри Суворов ячĕллĕ çар училищинче вĕреннĕ.
Тĕлпулу вĕçленес умĕн «Вспоминайте чаще с любовью» сăвва Зинаида Иванова вуларĕ. Чи юлашкинчен тĕлпулăва килнĕ салтаксене тав туса, хăвăртрах вăрçă чарăнса тĕрĕс-тĕкел киле таврăнмалла пултăр тесе ырă сунчĕ шкул директорĕ А.В.Гурина.
Шкул ачисем, вĕрентекенсем гуманитари пулăшăвĕ, талисмансем, кашни салтак чунне ăшăтакан çырусем хатĕрленĕ.
Людмила МИХАЙЛОВА,
Чутей шкулĕ
