Çуркунне çитрĕ, эппин чи асăрхануллă пулмалли тапхăрсенчен пĕри пуçланчĕ. Çанталăк ăшăтса пынă майăн çуртсен тăррисенчен юрпа пăр анать. Кăçал юрĕ нумай çумарĕ пулин те, пурпĕрех пур-ха. Çавăнпа та аса илтерсе хăваратпăр, нумай хутлă çуртсен çум.пе утса çӳремелле мар. Тем пуласси пур. Кăштах айккинерех, çурт хӳмисенчен пăрăнарах утса пырсан аванрах пулĕ.
Ялсенче вара хуралтăсем тăрринчи капланса ларнă юр куписене антарсан лайăхрах та пуль. Вăл тăрă ишĕлсе анассинчен те, ирĕлнĕ шывсем хуралтăсен хӳмисене нӳрлентерсе кăвакартассинчен те хӳтĕлĕ.
Тĕпсакайсене, нӳхрепсене шыв илессинчен, картишсене шыв юхтарассинчен сыхлас тесе канавсем хатĕрлемелли пирки тата шыв çулĕсене уçмалли çинчен те аса илтеретпĕр. Ĕçĕ йывăрах та мар, анчах усси питĕ пысăк.
Çулсем нӳрлĕ, шыв юхсах тăрать, çавна май каç енне, çанталăк шăнтнăран, йăлтах пăрпа витĕнет. Çавăнпа та начар шăвакан атă-пушмак тăхăнма тёрёшёр. Кафель сарнă вырăнсенче пушшех те тимлĕ пулмалла. Шуса ӳкме пуçларăр пулсан, кукленсе ларсан аванрах, çапла майпа аманассинчен хӳтĕленме май пур. Атă-пушмак тĕпне лейкопластырь, изолента çыпăçтарма пулать. Шкуркăпала тĕпĕсене хырсан та темскерех пулмĕ. Хамăр хăрушсăрлăх хамăр алăра.
