Тăвайри тĕп библиотекăра культура ĕçченĕсен профсоюзĕн Тăвай территори организацийĕн отчетпа суйлав конференцийĕ иртнĕ. Унта отчетлă тапхăрăн 2020—2025 çулсенчи ĕçĕсене пĕтĕмлетнĕ тата малашлăхри приоритетлă çул-йĕрсене палăртнă. Конференци ĕçне культура ĕçченĕсен Чăваш Республикинчи организацийĕн председателĕ Светлана Валериановна Демидова, муниципалитет округĕн культура, социаллă аталану тата архив ĕçĕсен пайĕн начальникĕ Оксана Алексеевна Кириллова, çак тытăма кĕрекен клубсемпе библиотекăсен, район хаçат редакцийĕн пуçламăш организацийĕн делегачĕ-сем хутшăннă.
Пилĕк çулхи отчетсемпе округри культура ĕçченĕсен профсоюз организацийĕн ертÿçи Алена Николаевна Абрамова паллаштарнă, ĕç килĕшĕвĕсем, ĕçлекенсен прависене хÿтĕлесси çине тимлĕх уйăрнине, пуçламăш организацисен ертÿçисем территори комитечĕпе тачă çыхăнса ĕçленине пĕлтернĕ. Малашне профсоюз активĕн право пĕлĕвĕ парассипе информаци ĕçне лайăхлатасси çине, ĕçлекен çыннăн социаллă гарантине тимлĕх уйăрма палăртнă. Профсоюз социаллă килĕшĕве аталантарассинче пысăк вырăн йышăннине асăннă хăйĕн сăмахĕнче Светлана Демидова, республика шайĕнчи ĕç-хĕл çинче чарăнса тăнă май. Ĕçре пултаруллисене — Альбина Валериановна Андреевапа (библиотека) Мария Павловна Семенована («Ял ĕçченĕ» хаçат редакцийĕ) Тав çырăвĕпе чысланă.
Конференцинче пĕр саслă пулса округри культура ĕçченĕсен профсоюзĕн территори комитечĕн ертÿçи пулма библиотекăсен пĕрлештернĕ системин директорне Алена Абрамована, 24-мĕш конференци делегачĕ пулма та ăнах суйланă. Пĕтĕм Раççей профсоюзĕн ЧР организацине ертсе пыма С.В.Демидована сĕннĕ.
Раиса ШУМОВА
