«Хастар вăрăм ĕмĕр» центрта Тăвай чиркĕвĕн настоятелĕпе Георгий Петров протоиерейпа тĕл пулнă. Кĕмĕл волонтерсен питĕ кирлĕ те пархатарлă ĕçĕ — ятарлă çар операцийĕнчи салтаксене пулăшни çинчен калаçу иртнĕ.
Округра пурăнакансем кÿрекен гуманитари пулăшăвĕ фронтшăн мĕн тери пĕлтерĕшлĕ. Самантлăха та ĕç чарăнмасть центрта: хÿтĕлев тетелĕ çыхаççĕ, окоп çуртисем хатĕрлеççĕ. Кирлĕ ытти хатĕр-хĕтĕр туянса ентешсем патне ăсатаççĕ. Маскировка тетелĕсемпе боецсене, çар техникине тата ытти кирлĕ объектсене хÿтĕ-леме анлăн усă кураççĕ. Георгий атте те самантлăха вĕсемпе ĕçре пулчĕ.
Паллах, пирĕн хÿтĕлевçĕсем тылри пулăшăва тата кил ăшшине туяççĕ, час-часах çапăçу иртекен зонăран тав сăмахĕсемлĕ çырусем килеççĕ. Георгий атте кĕмĕл волонтерсен ĕçĕпе кăсăкланнă май чуна уçса калаçрĕ. Çĕнтерĕве çывхартма курăмлă тÿпе хывнăшăн тав турĕ, Турă пиллĕхĕпе вăй-хăват сунчĕ.
Наталия ФЕДОРОВА
