Март уйăхĕнче эпир халăхăн йăла ыйтăвĕсене тивĕçтерекен тата пурăнмалли çурт-йĕрпе коммуналлă хуçалăхăн хисеплĕ ĕçченĕсене професси уявĕпе чыслатпăр. Вĕсем хăйсен ĕçĕпе пирĕн кулленхи пурнăçа хăтлăрах, илемлĕрех тăваççĕ. Çывхаракан професси кунĕ тата хĕрарăмсен уявĕ умĕн вĕсен ĕçĕпе паллашас туйăм илсе çитерчĕ округ центрĕн- чи кивĕ шкула хирĕç вырнаçнă «Для Вас» парикмахерскине.
Наталия Петрова хăйĕн ĕçне 2006 çулхи декабрь уйăхĕн-че уçнă. Йăла çуртĕн- че тăрăшнă чухнех çак шухăш çирĕпленнĕ унра. Çывăх çыннисем, чи малтанах мăшăрĕ, пулăшса пыни ĕçе пуçăнма хавхалантарнă.
Мал ĕмĕтлĕ те малалла аталанса пыракан предприниматель 2019 çулта Чăваш Енри хĕрарăмсен союзĕ ирттернĕ «Хĕрарăм — ертÿçĕ» конкурсра лауреат пулса тăнă. Ун хыççăн ытти ĕç-хĕл-ре те хăйне кăтартнă. Мĕн панă-ха çакă? «Ыттисем ĕçре мĕнле çĕнĕлĕхсем кĕртнине пĕлмеллех. Пурнăçран юлмалла мар»,— кăмăллăн хуравларĕ çамрăк хĕрарăм. Стена çинче республика шайĕн- чи ăстаçăсен тупăшăвĕнче çĕнтернĕшĕн тивĕçнĕ наградăсем, райадминистрацин Хисеп грамоти, Республика Пуçлăхĕ чысланă самантри сăн ÿкерчĕк... Çаксем ĕнтĕ — хисеплĕ ĕçĕн хаклавĕсем.
Ирех илем кÿрекен парикмахерскине çынсем пыма пуçларĕç. Паллакан хĕрарăма тĕл пултăм. «Çакăнта çÿç кастармалли уçăлнă кунранпах çÿретĕп. 20 çул та çитрĕ пулĕ. Хăйсен ĕçĕнчи универсалсем кунта. Таса, хăтлă, тирпейлĕ. Зала кĕриччен вырнаçтарнă массаж кресло çине ларса çан-çурăма çемçетсе илме пулать. Илемлĕ, хама кăмăла каякан прическа тутарса тухса кайнă май кунта ĕçлекенсен йăл çиçекен куçĕсене курса та савăнатăп. Ылтăн алăллăскерсем татах килĕр тесе ăшшăн ăсатаççĕ»,— тет 50 çулсене çывхараканскер.
Хăйсен ăсталăхне ÿс- терессипе тимлеççĕ Наталия Ивановна Петровапа Людмила Сергеевна Новикова парикмахерсем. Интернет уçлăхĕн-чи, модăллă журналсенчи çĕнĕлĕхсемпе паллашаççĕ. Иккĕшĕ те çемьеллĕ, ача-пăчаллă. Людмилăн хĕрĕ Шупашкарта вĕренет. Наташăн хĕрĕ Чăваш патшалăх университетĕнче диплом илнĕ ĕнтĕ, ывăлĕ те çав аслă шкултах вĕренет. Ашшĕ-амăшне çитĕнĕвĕсемпе савăнтараççĕ.
Çуркунне çывхарать. Илем, улшăну вăхăчĕ. Мартăн 8-мĕшĕ, пĕтĕм тĕнчери хĕрарăмсен кунĕ... Ытларах чиперуксем парикмахерскинче. Илемлĕ прическа тутарасшăн, çÿç сăрлаттарасшăн, кăтралаттаракансем те пур. Арçынсем те илĕртÿллĕ курăнасшăн. Вĕренекенсем хальхи модăпа çÿç кастарасшăн.
— Кăмăл туртнипе суйланă ĕç пирĕншĕн — чун уççи те, кăмăл ăшши те. Кунĕпех çынсемпе, вăхăт иртни те сисĕнмест,— теççĕ Н.Петровапа Л.Новикова.
Раиса ШУМОВА
