Кам мĕнле те, Çĕнтерÿ кунне
Мĕльюншарĕ куççуль
витĕр тухрĕ.
Лартаймарĕç чĕркуççи çине,—
Тăшман чакрĕ, вăйĕ пĕтрĕ, хухрĕ.
Фронт кĕрлевĕ анăçа ăсанчĕ.
Салтака кĕтеççĕ килĕнче.
Чăна тухрĕ пехилленĕ шанчăк —
Чыса тивĕçрĕмĕр —
çĕршыв умĕнче!
Савăнăç саманчĕ, акă, çитрĕ,
Саланатпăр аякри çĕртен.
Пуйăс тĕтĕмне пĕлĕт çăтрĕ:
Çĕр-аннемĕр, савăнса чĕтрен!
Ĕненмесĕр, эпĕ вĕçнĕ тейĕн,
Çухрăмсен шутне сисмесĕрех,—
(Виçи çуккă ку чухне телейĕн),—
Кăкăрта сиксе тапать чĕре!
Эп анса юлнă вокзалран
Çуран утма нумаях мар-ха.
Кĕçех тĕл пулăп мăшăра,
Хам хĕрĕме — пĕр савăнар-ха.
Мана кĕтсе, савниçĕм,
арăм, чăтрăн,
Хĕне çĕнтертĕн халăхпа.
Хĕре ÿстертĕн тепĕр ăстрăм,
Унпа юлмарăр тăлăха!
Фронт шавĕпе тăван ене
Танлаштарма кирлех-ши, тетĕп.
Автоматран тăшман çине
Эп тĕлĕкре хăш чух перетĕп.
... Кĕçех каç сĕмлĕхĕ хупларĕ,
Çитмерĕ темшĕн кун каçи.
Нуша тени, манран хăпмарĕ —
Кашни виçен те пур виçи!
Тинех утмастăп эп — чупатăп,
Халь ывăнни те темех мар.
Хĕр, мăшăр умрине туятăп,
Умра çутатнă пек хунар.
Васкатăп — вăйăма шанатăп,
Çитетĕп тăван кĕтесе.
Сасартăк тарлатăп, шăнатăп —
Тăрап пĕр вăхăт йÿтесе.
Сăнап каррисĕр кантăк витĕр:
Кам-ши, епле-ши унта?
Арăм хулпуççи çинчи тутăр
Унчченхи пекех, тупата!
Чĕпкуçлă лампа çутинче
Ларать тетрадьсем умĕнче.
Нумайланнă шур тĕс çÿçĕнче,
Пĕркеленчĕксем пур питĕнче.
Вĕрентÿçĕн çавнашкал ĕçĕсем:
Ĕçсене купана пĕрлештер;
Тĕрĕслевçĕн хавшак каçĕсем —
Ĕç шайĕпе нуши — пĕрешкел!
Раскладушка çинчи хĕрĕме
Сăнарăм, палларăм ăна.
Пулать алăпа перĕнме,
Шик пур вăратма ыйхăран.
Пĕлетĕп: кĕтет ашшĕне,
Тĕлĕкре аташать пуль манпа.
Сисет алăсен ăшшине —
Вĕсене пулать-и манма?
Шаккас тетĕп —
шăнăрсем хытрĕç.
Чĕнес тетĕп — сассăм тухмасть.
Чĕрене хĕсет шалтан тыткăç,
Чÿрече енне арăм пăхмасть.
Ара, эп «хыпарсăр çухалнă...»
Кайран пĕлтĕм, хутне янине.
Анраса тем çине таяннă...
Астăватăп шала тÿннине.
— Эпĕ çитрĕм! —
тесе пăшăлтатнă,
Тăрмакланă урай хăмине
Урасем. Тирĕнсе хăшăлтатнă
Сăмахсем ăнланман тĕввине.
Салтака паллаймарĕ арăм,
Алăка аптăрарĕ хупма.
Хамшăн мар эп — уншăн хăрарăм,
Эп пултарнă ăна аптратма.
Тăна кĕтĕм: — Вăрат хĕрĕме,
Унпа ман часрах калаçасчĕ!
Унтан пуçланă йĕрмешме...
Тăвансем —
тепĕр хут тăванланчĕç.
Хĕре чун сисевĕ систернĕ:
— Атте, эсĕ çитрĕн тинех!
— Текех пулмĕ вăрçă кĕрлевĕ,
Çĕнтерÿпе килтĕм киле.
.....
Аса илтĕм яла çитнине,
Асапсем хушшинчен тухнине,
Куççуле çăварпа çăтнине,
Хĕрпе арăм куçран пăхнине.
Çĕнтерÿ — эпир кĕтнĕ уяв,
Уявсен — чи аслă Уявĕ!
Сана — чи çÿллĕ хаклав,
Умра пултăр унăн ялавĕ!
Вырăсларан Лаврентий ДАНИЛОВ
(Сăхăтпуç) куçарнă
