Çĕрпÿри ветеринарипе санитари утильзавочĕ çĕнĕрен вăй илмелле. Çапла палăртнă Чăваш Ен Пуçлăхĕ Олег Николаев тунтикун ĕç тăвакан влаç органĕсен тата муниципалитетсен ертÿçисемпе ирттернĕ канашлура.
Çĕрпÿри ветеринарипе санитари утильзавочĕн 6 кăмакаран 5-шĕ 100 проценчĕпех юхăннă. 1978 çултах хута янăскерĕн ытти оборудованийĕ, çурчĕсем те кивелсе çитнĕ. Завод вара пысăк пĕлтерĕшлĕскер - биологи каяшĕсене тирпейлессине хăрушсăрлăхпа тивĕçтерессипе çыхăннă. Унта туса кăларакан продукци те - ашпа шăмă çăнăхĕ - выльăх-чĕрлĕх, кайăк-кĕшĕк ĕрчетес ĕçре пысăк пĕлтерĕш- лĕ. Ăна тĕрлĕ регионти предприятисем туянаççĕ. Кăмакасене, ытти оборудование улăштармалла, автомобильсене çĕнетмелле. Кунта 32 çын ĕçлет - сиенлĕ условисенче вăй хуракансен шалăвĕ пĕчĕк. Канашлура палăртнă ĕçсене тапхăрăн-тапхăрăн пурнăçламалли план хатĕрлеме хушнă.
