Чĕре ан ыраттăр тесен кунсерен капиллярсене çирĕплетекен упражнени тумалла. Кравать çинче выртса урасемпе алăсене çĕклемелле, вĕсене 100-е çити шутланă май силлесе хускаткаламалла.
Чĕрепе юн тымарĕсем чирлĕ чухне пылпа кукша пуç (одуванчик) настойĕ тумалла. Чечексене вĕтĕ турамалла, çиелтен пыл ярса лартмалла, тĕттĕм вырăнта 7 кун тытмалла, хушăран силлесе хутăштармалла. Çывăрас умĕн 1 кашăк çимелле, сĕтпе сыпса ямалла. Кунашкал настой уйрăмах инфаркт хыççăн усăллă.
Аритмия пулсан виноград эрехĕн кĕленчине (белое вино) 300 г пахча кĕпçин (петрушка) тымарĕпе тунине, 50 г шурă пыл, 12 салтак тÿмин (ромашка) чечекĕн 12 сарă варрине ямалла.
Пурне те пĕрле эрех вĕреме кĕриччен 5-10 минут çулăм çинче тытмалла, сăрăхтарса тасатмалла. Апатчен 30-шар г ĕçмелле.
Атеросклероз, тромбоз пулсан, пуç ыратсан «вероника лекарственная» текен типĕтнĕ курăка 1 апат кашăкĕ чухлĕ илсе вĕретнĕ 1 стакан шыва ярса 2 сехет тăрăлтарса лартмалла. Кунсерен 3 хут апатчен 15 минут маларах 2 апат кашăкĕ сыпмалла. 21 кун сипленмелле. 1 эрне тăхтамалла та тепĕр хут пĕтĕмпех çĕнĕрен тумалла.
Кăкăр пÿлĕнсен (сердечная одышка) хăмăш чечекне савăта чей пек ярса лартмалла. Ăшăлла кашни 4 сехетрен 5-шер сыпкăм ĕçмелле. Пĕр уйăхран кăкăр пÿлĕнни иртсе каясса ĕнентереççĕ.
